បុរសម្នាក់កំពុងបង់ត្រីត្រូវរន្ទះបាញ់បណ្តាលឲ្យស្លាប់ភ្លាមៗនៅនឹងកន្លែង។ហេតុការណ៍បង្កឲ្យភ្ញាក់ ផ្អើលនេះ បានកើតឡើងនៅវេលាម៉ោង០២និ៤០នាទីរសៀលថ្ងៃថ្ងៃទី១៣ខែធ្នូ ឆ្នាំ២០២០ នៅចម្ងាយ១,៥០០ម៉ែត្រខាងលិចភូមិប៉ោយស្នួល ឃុំប៉ោយចារណ៍ ស្រុកភ្នំស្រុក ខេត្តបន្ទាយមានជ័យ ។
លោកវរសេនីយ៍ឯក យ៉ត សុផល អធិការនគរបាលស្រុកភ្នំស្រុក បានឲ្យដឹងថា៖ជនរងគ្រោះឈ្មោះ ហៃ ព្រឿងភេទប្រុស អាយុ២៩ឆ្នាំ នៅភូមិប៉ោយស្នួល ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ ។
លោកអធិការបានបញ្ជាក់ថា៖នៅមុនពេលកើតហេតុជនរងគ្រោះនិងមានអ្នកភូមិជាច្រើននាក់ទៀត បាននាំគ្នា ទៅបង់ត្រីនៅចំណុចប្រឡាយទំនប់ធំខាងលិចភូមិប៉ោយស្នួលចំងាយ១,៥០០ ម៉ែត្រ។នៅពេល ដែលកំពុងបង់នោះ ស្រាប់តែមានភ្លៀងធ្លាក់មួយមេ(មធ្យម) ហើយអ្នកបង់ត្រីទាំងនោះ រួមទាំងជនរងគ្រោះ បាននាំគ្នាទៅជ្រកនៅរោងក្បែរកន្លែងបង់ត្រី ។ បន្ទាប់មកក្រោយភ្លៀងបង្អោរស្រិចៗ ជនរងគ្រោះនិង ក្មេងៗចំនួន០២នាក់ទៀតបានចេញពីរោងដើម្បីបង់ត្រីទៀត នៅពេលកំពុងតែឈររលាស់សំណាញ់ក៏ត្រូវរន្ទះបាញ់ជនរងគ្រោះដែលឈរនៅកណ្តាល បណ្តាលឲ្យស្លាប់ភ្លាមៗនៅនឹងកន្លែងបង់នោះតែម្តង។
លោកអធិការបានបញ្ជាក់បន្ថែមទៀតថា៖ក្រោយពីទទួលបានព័ត៌មាន កម្លាំងជំនាញសហការណ៍ជាមួយប៉ុស្តិ៍រដ្ឋបាលឃុំប៉ោយចារ ចុះពិនិត្យសពនៅកន្លែងកើតហេតុ ជនរងគ្រោះមានរហែកខោនិងស្នាមជាំជិតគ្រលៀន ពិតជាស្លាប់ដោយរន្ទះបាញ់ប្រាដកមែន។ក្រោយពីពិនិត្យរួចសពជនរងគ្រោះត្រូវបានប្រគល់ជូនក្រុមគ្រួសារយកទៅចាត់ចែងធ្វើបុណ្យតាមប្រពៃណី ៕
