បុរសម្នាក់ដែលត្រូវបានគេស្គាល់ និងហៅងារជាឧកញ៉ា ម្ទេស បានរងរបួសស្រាល ដោយសារត្រូវគេវាយបែកមាត់នឹងដៃចំនួន ៣ដៃ គ្រាន់តែជារឿងលុយ១ម៉ឺនរៀលសោះ។ ហេតុការណ៍នេះ បានកើតឡើងនៅវេលាម៉ោង ២ និង៣០នាទី ថ្ងៃទី១៣ ខែធ្នូ ឆ្នាំ២០២០ ស្ថិតនៅហាងការហ្វេមួយកន្លែង ក្នុងភូមិអូរជញ្ជៀន ឃុំអន្លង់វែង ស្រុកអន្លង់វែង ខេត្តឧត្តរមានជ័យ។
យោងតាមរបាយការណ៍របស់PMស្រុកអន្លង់វែង បានអោយដឹងនៅថ្ងៃទី១៤ ខែធ្នូ ឆ្នាំ២០២០នេះ មូលដ្ឋានPMស្រុកអន្លង់វែង បានទទួលពាក្យបណ្តឹង ១ច្បាប់ពីឈ្មោះ ប៑ុនកេត សនសុរ៉ាត់ ភេទប្រុសអាយុ៤១ឆ្នាំ មុខរបរអាជីវកររស់នៅ ភូមិជើងភ្នំ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ បានប្តឹង ឈ្មោះ មាន និត ហៅណប់ ភេទប្រុស អាយុ៣៣ឆ្នាំ មុខមន្ត្រីយោធា បំរើការនៅអង្គភាពកងពលតូចលេខ៤១រស់នៅ ភូមិអូរជញ្ជៀនឃុំ-ស្រុកអន្លង់វែង ខេត្តឧត្តរមានជ័យ ដោយចោទប្រកាន់ឈ្មោះ មាន និតហៅ ណប់ បានវាយទៅលើខ្លួនចំលើមុខចំនួន៣ដៃ មូលហេតុទាស់ពាក្យសំដីគ្នា។ ហើយឈ្មោះ ប៊ុនកេត សនសុរ៉ាត់ បានបញ្ចប់រឿង ដោយបានយល់ព្រមធ្វើកំណត់ហេតុសុំដកពាក្យបណ្តឹងឈប់ប្តឹងតវ៉ាបន្តទៀត។
តាមអោយដឹងពីអ្នកនៅក្នុងរោងការហ្វេបាននិយាយថា នៅមុនកើតហេតុ មានការភ្នាល់គ្នាលេងមាន់ជល់តាមទូរទស្សន៍ រវាងឈ្មោះ ប៊ុនកេត សនសុរ៉ាត់ ហៅឧកញ៉ាម្ទេស ជាមួយនឹងឈ្មោះ ណប់ ដាក់លុយចំនួន ៤ម៉ឺនរៀល។ ពេលនោះមាន់ឧកញ៉ាម្ទេស បានចាញ់ ក៏អោយលុយទៅអោយឈ្មោះ ណប់ ។ ហើយស្រាប់តែឮប្រកែកពាក្យគ្នារឿងលុយ១ម៉ឺនរៀល ដែលអោយក្រដាស៥ម៉ឺនរៀល មិនទាន់អាប់អោយ ដោយឈ្មោះ ណប់ និយាយស្បថថា ខ្លួនអោយអាប់អស់ហើយ។ តែឧកញ៉ាម្ទេសប្រកែកថា មិនបានយក ពេលនោះឧកញ៉ាម្ទេសបាននិយាយគំរាមថា បើមិនអោយលុយ១ម៉ឺនរៀលទេ ក៏មិនអាចចេញពីរោងការហ្វេបានដែរ។ ស្រាប់តែឈ្មោះ ណប់ បានដើរចេញពីតុ ឧកញ៉ាម្ទេស បានដើរទៅស្ទាក់ពីមុខ ហើយបួងករ.អាវឈ្មោះណប់ បានវាយ៣ដៃត្រូវកញ្ចប់មាត់បណ្តាលអោយបែកឈាម។ ហើយលោកឧកញ៉ាម្ទេស និងមានគ្នីគ្នាម្នាក់ទៀត បានចាប់ឈ្មោះ ណប់ វាយប្រតាយប្រតប់គ្នា ដែលអ្នកនៅក្បែរជួយបំបែកទើប។ ក្រោយមកភ្លាមៗ កម្លាំងអន្តរាគមន៍ពីPMស្រុកបាននាំអ្នកពាក់ព័ន្ធទៅស្នាក់ស្រុក ដើម្បីដោះស្រាយ៕
ដោយម្លប់សន្តិភាព
