(ខេត្តកំពត)ប្រជាពលរដ្ឋជាង៥០គ្រួសារនៅសង្កាត់កោះតូច ក្រុងបូកគោ ខឹងសម្បាជាមួយក្រុមហ៊ុនកំពត ខណៈដែលក្រុមហ៊ុនខាងលើ ដាក់គ្រឿងចក្រឈួសឆាយដីចំការរបស់ពលរដ្ឋជាច្រើនគ្រួសារហើយមានកម្លាំងយោធាកាងទៀតផង ប្រជាពលរដ្ឋដែលមានជម្លោះដីធ្លីជាមួយក្រុមហ៊ុនកំពតផត នៅព្រឹកថ្ងៃទី២៨ខែតុលាឆ្នាំ២០២១នេះ បានលើកគ្នាទៅតវ៉ាដល់ទីតាំងដី ដែលក្រុមហ៊ុនដាក់កម្លាំងយោធាកំពុងឈូសឆាយរំលោភកយដីចំការពលរដ្ឋជាង៥០គ្រួសារ ដែលស្ថិតនៅក្នុងភូមិព្រែកអំពិល សង្កាត់កោះតូច ក្រុងបូកគោខេត្តកំពត។
ពាក់ព័ន្ធរឿងទំនាស់ដីធ្លីខាងលើ ប្រជាពលរដ្ឋ បានចោទប្រកាន់ឧត្តមសេនីយ៍ទោហុកចិន្តា មេបញ្ជាការយោធាតំបន់ប្រតិបត្តិការសឹងរងខេត្តកំពតថាជាអ្នកបញ្ជាពីក្រោយខ្នង ក្នុងផែនការរំលោភយកដីចំការរបស់ពួកគាត់ខណៈដែលដីនៅតំបន់នោះមានតម្លៃខ្ពស់ ព្រោះថាជាតំបន់អភិវឌ្ឍន៍ក្រុងថ្មី។
ប្រភពបានអោយដឹងថាដីចំការ ដែលកំពុងមានទំនាស់ជាមួយក្រុមយោធានៅតំបន់ខាងលើ មានចំនួនជិត៩០ហិតា ដែលពលរដ្ឋប្រមាណជា៥០គ្រួសារបានស្រ័យផលលើផ្ទៃដីចំការនោះតាំងពីឆ្នាំ២០០៨មកម្លេះ រហូតមកដល់ឆ្នាំ២០១២ ដីពួកគាត់ត្រូវបានក្រុមនិស្សិតស្ម័គ្រចិត្តរបស់សម្តេចតេជោ ក៏បានវាស់ដែរ បន្ទាប់មកប្រជាពលរដ្ឋបានអាស្រ័យហូតដល់២០២១នេះ បែជាលេចមុខក្រុមហ៊ុនកំពតផតមកឈួសឆាយរំលោភយកទាំងបំពាន ហើយមន្ត្រីយោធា ក្រោមឱវាទលោក ហុក ចិន្តា មេបញ្ជាការប្រតិបត្តិសឹករងកំពត មកកាងដីអោយក្រុមហ៊ុនអះអាងថាដីចំការពលរដ្ឋគ្រប់គ្រងខាងលើនេះ ជាដីរបស់ទាហាន ទុកជាទីលានវឹកវើនបាញ់គ្រាប់ពិតទៅវិញ។
លោក សឹង ទី ប្រជាពលរដ្ឋរស់នៅភូមិព្រែកអំពិល សង្កាត់កោះតូច ក្រុងបូកគោបានអោយដឹងថា ដីចំការរបស់ពួកគាត់ត្រូវបានភាគីខាងក្រុមហ៊ុនកំពតផត កំពុងដាក់គ្រឿងចក្រទៅឈូសឆាយផលដំណាំរបស់ពួកគាត់យ៉ាងរំភើយ ហើយពលរដ្ឋរងគ្រោះដីធ្លីខាងលើនេះ មិនមានដំណោះស្រាយពីអាជ្ញាធរឡើយ ចំណែកឯមន្ត្រីជំនាញខ័ណ្ឌរដ្ឋបាលព្រៃឈើ ដែលចំណុះអោយនៃមន្ទីរកសិកម្មខេត្តកំពតនិងទាហាន បែជាអ្នកហាមឃាត់ពលរដ្ឋមិនអោយចូលអាស្រ័យផលខ្លួនទៅវិញ។
ចំពោះបញ្ហានេះត្រូវបានគេមើលឃើញថា ការអនុវត្តន៍ច្បាប់មានស្តង់ដា២ ពោលគឺបិទភ្នែកម្ខាង បើកភ្នែកម្ខាង ដោយទទួលរងនូវភាពអយុត្តិធម៌ ពីសំណាក់ទាហានកាងដីអោយក្រុមហ៊ុន កាលពីកន្លងមក ប្រពលរដ្ឋក៏ធ្លាប់បានដាក់ពាក្យបណ្តឹងទៅរដ្ឋបាលខេត្តកំពតចំនួន២ដងរួចមកហើយ កាលនៅអភិបាលខេត្តចាស់ដែលមិនទាន់ផ្លាស់ប្តូរ ក៏ប៉ុន្តែពលរដ្ឋរងគ្រោះដីធ្លីខាងលើ មិនទទួលបានដំណោះស្រាយឡើយ (ដូចវ៉ៃទឹកបង្អើលត្រី វ៉ៃព្រៃបង្អើលសំពូច) ពោលគឺធ្វើអោយភាគីខាងក្រុមហ៊ុននិងទាហានរឹតតែបានដៃរំលោភពានបន្តខ្លាំងជាងមុន។
ចំណែកលោក ម៉ៅ នីនិងពលរដ្ឋជាច្រើនគ្រួសារទៀត ដែលរស់នៅភូមិសង្កាត់ខាងលើ បាននិយាយស្រដៀងគ្នាថាដីចំការណលរដ្ឋចំនួន៥០គ្រួសារដែលមានទំនាស់ខាងលើនេះ មានផលដំណាំដូចជាដំណាំចេក ស្វាយជាដើម ដែលពួកគាត់អាស្រ័យផលជាច្រើនឆ្នាំអស់ជាច្រើនឆ្នាំ ក៏ប៉ុន្តែនៅឆ្នាំ២០២១នេះ បែជាក្រុមទាហាន ដែលស្គាល់ថា មកពីសឹងរងខេត្តកំពតយកបោះទីតាំងកាងដីអោយក្រុមហ៊ុនកំពតផត យកគ្រឿងចក្រឈូសឆាយកម្ទេចផលដំណាំពលរដ្ឋគ្មានសល់និងវាទទីរំលោភយកដីចំការរបស់ពួកគាត់ទាំងកម្រោល ដោយមិនអាណិតអាសូដល់ពលរដ្ឋទន់ខ្សោយឡើយ។
ពាក់ព័ន្ឋរឿងទំនាស់ដីធ្លីនេះដែរ ប្រជាពលរដ្ឋបានប្រតិកម្មទៅទង្វើររបស់មន្ត្រីយោធា ដែលមានលោក ហុក ចិន្តា ជាអ្នកប្រព្រឹត្តនៅពីក្រោយ ក្រុមហ៊ុនកំពតផត ថាបានរំលោភយកដីពលរដ្ឋទាំងបំពានបែបនេះ គឺជាករណី ដែលកំពុងបំផ្លាញគោលនិយោបាយ របស់សម្តេចតេជោ ព្រមទាំងនាំអោយបះពាល់មុខមាត់ថ្នាក់ដឹកនាំផងដែរ។
ដោយភាពអស់សង្ឃឹម និងគ្មានដំណោះស្រាយនាពេលកន្លងមក ប្រជាហាក់មានសង្ឃឹមខ្លះវិញហើយ បន្ទាប់ពីលោកម៉ៅ ធនិន មកកាន់តំណែងជាអភិបាលខេត្តថ្មី ដែលជាក្តីសង្ឃឹមចុងក្រោយរបស់ពលរដ្ឋទន់ខ្សោយ ជាមួយគ្នានោះផងដែរ ប្រជាពលរដ្ឋ សូមណូមពរដល់ លោកឧត្តមម៉ៅធនិនអភិបាលខេត្តកំពត មេត្តាជួយរកយុត្តិធម៌ អោយពលរដ្ឋពួកគាត់ផង។
ក្រោយពីពលរដ្ឋផ្ទុះការតវ៉ាដល់ចំណុចទីតាំងដីខាងលើ លោកពៅ ចាន់ឌី មេបញ្ជាការប្រតិបត្តិការសឹករងក្រុងបូកគោចេញមកបញ្ជាក់ថា លោកមកគ្រប់គ្រងលើដីនេះ គឺធ្វើតាមមេបញ្ជាប៉ុណ្ណុះ បើចង់បានដីវិញសូមទៅប្តឹងទៅរដ្ឋបាលខេត្ត ឬក៏តុលាការទៅលោកមិនមានសិទ្ធដោះស្រាយទេ ហើយលោកថា ដីនេះគេយកធ្វើបន្ទាយទាហានសឹងរងក្រុងបូកគោថ្មីហើយក៏ជាទីតាំងសម្រាប់សម៌យុទ្ធបាញ់គ្រាប់ពិតផងដែរ។
តែទោះបីយ៉ានេះក្តីក្រុមការងារអង្គភាពសារព័ត៌មានម្លប់សន្តិភាពយើងមិនទាន់អាចសុំការបំភ្លឺពីលោក ហុក ចិន្តា មេបញ្ជាការតំបន់ប្រតិបត្តការសឹករងខេត្តកំពតបានទេនៅឡើយទេ នៅព្រឹកថ្ងៃ៣០ខែតុលាឆ្នាំ២០២១នេះដោយគ្មានលេខទូរស័ព្ទទំនាក់ទំនង ៕
