ពិធីបញ្ចុះបឋមសិលាសាងសង់អាគារផ្តល់ឈាមមន្ទីរពេទ្យបង្អែកខេត្តឧត្តរមានជ័យ ក្រោមធិបតីភាព ឯកឧត្តម គីម រិទ្ធី អនុប្រធានសហភាពសហព័ន្ធយុវជនកម្ពុជា ឯកឧត្តម ស៊ី ប្រាសិទ្ធ ប្រធានក្រុមប្រឹក្សាខេត្ត និងឯកឧត្តម មាន ចាន់យ៉ាដា អភិបាលខេត្តឧត្តរមានជ័យ ស្ថិតនៅ សង្កាត់សំរោង ក្រុងសំរោង ខេត្តឧត្តរមានជ័យ។
គម្រោងសាងសង់អាគារផ្តល់ឈាមដ៏ទំនើបនេះ គឺជាការឆ្លើយតបដ៏ចាំបាច់ចំពោះតម្រូវការឈាមដែលកំពុងកើនឡើងនៅក្នុងខេត្តឧត្តរមានជ័យ និងតំបន់ជុំវិញ។ អាគារថ្មីនេះនឹងបំពាក់ដោយឧបករណ៍វេជ្ជសាស្ត្រទំនើបៗ និងមានលំហរគ្រប់គ្រាន់សម្រាប់ការបរិច្ចាគ ការស្តុកទុក និងការវិភាគឈាមប្រកបដោយប្រសិទ្ធភាព និងសុវត្ថិភាពខ្ពស់។
អាគារថ្មីនេះមានសារៈសំខាន់ក្នុងការលើកកម្ពស់គុណភាពសេវាសុខាភិបាលនៅក្នុងខេត្ត នឹងដើរតួនាទីយ៉ាងសំខាន់ក្នុងការធានាបាននូវការផ្គត់ផ្គង់ឈាមគ្រប់គ្រាន់ និងទាន់ពេលវេលាសម្រាប់អ្នកជំងឺដែលត្រូវការ ជាពិសេសក្នុងករណីសង្គ្រោះបន្ទាន់ និងការវះកាត់ផ្សេងៗ។
នេះជាសមិទ្ធផលថ្មីមួយ ដែលលេចចេញជារូបរាងនាពេលដ៏ខ្លីខាងមុខ នឹងក្លាយជាផ្នែកមួយដ៏សំខាន់ក្នុងការផ្តល់សេវាសុខាភិបាលប្រកបដោយគុណភាព និងប្រសិទ្ធភាពជូនប្រជាពលរដ្ឋនៅក្នុងខេត្តឧត្តរមានជ័យ។
