ខេត្តកំពត ៖ ករណីកាប់បំផ្លាញដើមអាកាស្យាពលរដ្ឋមួយគ្រួសារ ដែលស្ថិតនៅស្រុកដងទង់ កំពុងក្លាយជារឿងក្តៅ ហើយរឿងទំនាស់ខាងលើ បានអូសបន្លាយអស់រយៈកាល៤ឆ្នាំ រីឯមហាជនក៏កំពុងតាមដាន ខណៈដែលរដ្ឋបាលខេត្តកំពតនិងអាជ្ញាធរស្រុកដងទង់ព្យាយាមផ្អិបសំណុំរឿងមិនមានដោះស្រាយផលបះពាល់ជូនពលរដ្ឋអស់រយៈពេល៤ឆ្នាំកន្លងមកហើយ ហើយដំណើររឿងខាងលើទោះបីលិខិតអន្តរាគមន៍ពីក្រសួងមហាផ្ទៃអោយរដ្ឋបាលខេត្ត ដោះស្រាយតាមគោលនិយោបាយជូនពលរដ្ឋយ៉ាងណាក៏ដោយ រហូតមកដល់ពេលនេះ ពលរដ្ឋរងគ្រោះនៅមិនទាន់ទទួលបានពន្លឺយុត្តិធម៌ពីក្រុមហ៊ុនអគ្គិសនីនៅឡើង។
ប្រភពអោយដឹងពីប្រជាពលរដ្ឋរងគ្រោះលោកមាស សេរ៉ី និងប្រពន្ធឈ្មោះសេង ធី ដែលមានលំនៅភូមិស្តុកធ្លក ឃុំទទុង ស្រុកដងទង់ ខេត្តកំពត បានអោយដឹងថា រូបគាត់២នាក់ប្តីប្រពន្ធកន្លងមក ត្រូវបានទទួលរងភាពអយុត្តិធម៌ ខណៈដែលក្រុមហ៊ុនអគ្គីសនីកម្ពុជា សាខាស្រុកបន្ទាយមាសខេត្តកំពត បានយកបង្គោលភ្លើងដាក់កាត់លើដីរបស់ខ្លួនដែលមានប្លង់កម្មសិទ្ធិស្របច្បាប់ មិនតែប៉ុណ្ណោះក្រុមហ៊ុននិងអាជ្ញាធរ បាននាំគ្នាកាប់បំផ្លាញ់ដើមអាកាស្យារបស់គាត់អស់ចំនួន៧,៣០៣ដើម ដែលពួកគាត់បានដាំលើដីកម្មសិទ្ធិឯកជនរបស់ខ្លួន លោកមាស សេរ៉ី បានបន្តថា ដីរបស់គាត់មានចំនួន៧ប័ណ្ណក្បាលដី ដែលស្ថិតនៅភូមិចង្គៀងខាងកើត ឃុំទទង់ ស្រុកដងទង់ ខេត្តកំពត។
ចំពោះកណីរំលោភសិទ្ធិអចលនទ្រព្យពលរដ្ឋស្របច្បាប់ខាងលើ ភាគីខាងក្រុមហ៊ុននិងអាជ្ញាធរស្រុងដងទង់ និងរដ្ឋបាលខេត្តកំពត កន្លងមកគ្មានដំណោះស្រាយផ្តល់សំណងផលបះពាល់ពីក្រុមហ៊ុនអគ្គីនីកម្ពុជាសាខាស្រុកបន្ទាយមាស ឬក៏អាជ្ញាធរខេត្តឡើយ ផ្ទុយទៅវិញ កាលពីថ្ងៃទី០២ ខែកក្តដា ឆ្នាំ២០២០ រដ្ឋបាលខេត្តកំពត ដែលដឹកនាំដោយលោកសេង សិរីបុត្រ អភិបាលរងខេត្តទទួលបន្ទុកដោះស្រាយទំនាស់ក្រៅប្រព័ន្ធតុលាការ បានត្រឹមតែចុះទៅដល់ទីតាំង ថែមទាំងបញ្ជាអោយកម្លាំងកាប់កម្ទិចដើមឈើលើដីពលរដ្ឋទៅវិញ សកម្មភាពបែបនេះ ត្រូវបានពលរដ្ឋដាក់ការសង្ស័យថា អាជ្ញាធរខាងលើ ប្រហែលជាមានផលប្រយោជន៍អ្វីមួយពីក្រុមហ៊ុនអគ្គីសនីសាខាស្រុកបន្ទាយមាសហើយ ទើបមិនព្រមរកដំណោះស្រាយផលបះពាល់តាមផ្លូវច្បាប់ បែជាដោះស្រាយតាមរប៊ៀបហឹង្សាបង្ខំពលរដ្ឋរងគ្រោះទៅវិញ។
ពាក់ព័ន្ធរឿងកាប់បំផ្លាញដើមអាកាស្យាលើដីកម្មសិទ្ធិឯកជននិងគ្មានសំណងអោយជនពលរដ្ឋបែបនេះ អង្គភាពសារព័ត៌មានយើងទទួលបានលិខិតពីជនរងគ្រោះចំនួន២ច្បាប់ ដែលពលរដ្ឋឈ្មោះមាស សេរ៉ី និងប្រពន្ធឈ្មោះសេង ធី បានប្តឹងសុំកិច្ចអន្តរាគមន៍ទៅកាន់សម្តេចក្រឡាហោម ស ខេង ឧបនាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃ កាលពីថ្ងៃទី០៨ ខែកក្តដា ឆ្នាំ២០២០ ខ្លឹមសារក្នុងលិខិតគឺលោកមាស សេរ៉ី និងប្រពន្ធវបានប្តឹងចោទលោកសេង សិរីបុត្រ អភិបាលរងខេត្តកំពត បន្ទាប់ពីលោកបានដឹកនាំកម្លាំងសមត្ថកិច្ចចម្រុះចំនួន៨៥នាក់ ប្រដាប់ដោយអាវុធ និងលោកស៊ៀវ ផេង អភិបាលស្រុកដងទង់ ព្រមទាំងអាជ្ញាធរ បន្ទាប់ពីកម្លាំងខាងលើបានកាប់បំផ្លាញដើមអាកាស្យារបស់គាត់អស់ចំនួន៧ ៣០៣ដើម នៅលើដីកម្មសិទ្ធិស្របច្បាប់ ដោយមិនមានការឯកភាពពីម្ចាស់ដីឬក៏ផ្តល់សំណង់ផលបះពាល់អោយម្ចាស់ដី មុននិងឈានដល់ការចុះអនុវត្តន៍ច្បាប់ លើសពីនេះទៀត ខាងអាជ្ញធរនិងសមត្ថកិច្ចថែមទាំងបង្ខំអោយអ្នកស្រី សេង ធីម្ចាស់ដី ផ្តិតមេដៃទទួលខុសត្រូវចំពោះការខូចខាតសម្ភារៈអគ្គិសនីទៅវិញ។
សូមបញ្ជាក់ថា លិខិតសុំកិច្ចអន្តរាគមន៍របស់លោកមាស សេរ៉ីនិងប្រពន្ធឈ្មោះសេង ធី ត្រូវបានរដ្ឋលេខាធិការក្រសួងមហាផ្ទៃ ចារទទួលកាលថ្ងៃទី០៨ ខែកក្តដា ឆ្នាំ២០២០ ក្នុងនោះដែររដ្ឋលេខាធិការក្រសួងមហាផ្ទៃ ចារបញ្ជូនមករដ្ឋបាលខេត្តកំពត កាលពីថ្ងៃទី៣០ ខែកក្តដា ឆ្នាំ២០២០ ដើម្បីអោយពិនិត្យឃើញ សំណើលោកមាស សេរ៉ីនិងប្រពន្ធឈ្មោះសេង ធី ដែលដំណើររឿងស្ថិតនៅក្រោមសមត្ថកិច្ចរបស់រដ្ឋបាលខេត្តកំពត ហេតុនេះក្រសួងមហាផ្ទៃ ស្នើអោយឯកឧត្តមជាវ តាយ អភិបាលខេត្តកំពត ពិនិត្យនិងដោះស្រាយស្របតាមច្បាប់និងលិខិតបទដ្ឋានគតិយុត្ត ដែលមានចែងជាធរមាន លទ្ធផលដោះស្រាយសម្រេចយ៉ាងណានោះ រដ្ឋលេខាធិការក្រសួងមហាផ្ទៃ អោយរដ្ឋបាលខេត្តកំពត ផ្ញើរជូនមកក្រសួងមហាផ្ទៃ វិញកុំបីខាន ក៏ប៉ុន្តែរហូតមកដល់ឆ្នាំ២០២១នេះ លោកមាស សេរ៉ី និងប្រពន្ធឈ្មោះ សេង ធី មិនត្រូវបានរដ្ឋបាលខេត្តកំពតដោះស្រាយណែនាំតាមការស្នើសុំរបស់ក្រសួងមហាផ្ទៃឡើយ។
ជុំវិញការលើកឡើងរបស់លោកមាស សេរ៉ី និងប្រពន្ធឈ្មោះសេង ធី ចំណែកឯលោកស៊ៀវ ផេង អភិបាលស្រុកដងទង់ និងលោកវិតវឌ្ឍនា នាយករដ្ឋបាលសាលាខេត្តកំពត បានឆ្លើយដាក់គ្នាដូចសម្លកំពឹស ពោលគឺមិនទទួលខុសត្រូវលើភារកិច្ចរបស់ខ្លួន។
ដោយឡែក ភាគីខាងក្រុមហ៊ុមអគ្គីសនីកម្ពុជា អង្គភាពសារព័ត៌មានVD7 news មិនអាចស្នើសុំការបំភ្លឺបានទេ នៅថ្ងៃទី២៧ ខែវិច្ឆិការ ឆ្នាំ២០២១នេះ ព្រោះគ្មានលេខទូរស័ព្ទទំនាក់ទំនង ៕
