(ខេត្តកែប) ៖ រថយន្តបែនតូចធំជាង២០០គ្រឿង បានចាប់ដំណើរការដឹកដីចេញពីជួរភ្នំព្រះក្នុងភូមិដំណាក់ចង្អើរ សង្កាត់ព្រៃធំ ក្រុងកែប យកទៅចាក់លុបសមុទ្រ ដែលជាគម្រោងអភិវឌ្ឍន៍រមណីយដ្ឋានឆ្នេរខ្សាច់កម្សាន្តសាធារណៈកម្រិតខ្ពស់ ដើម្បីពង្រីកឆ្នេរប្រវែង២.៧០០ម៉ែត្រស្ថិតក្នុងភូមិថ្មីសង្កាត់ព្រៃធំក្រុងកែប ។
ទោះបីជាបែបណាក្តីគេបានដឹងថា រថយន្តបែនដឹកដីកង់១០កាលពីដើមខែវិច្ឆិកានេះ បានដឹកអាចម៌ដីចាក់លុបសមុទ្រទៅតាមមុខសញ្ញានីមួយៗដែលក្រុមហ៊ុនឯកជនដេញថ្លៃបាន ។ ប៉ុន្តែបានផ្អាកដំណើរការវិញមួយដង្ហើមចង្រិតដែរដោយសារតែផ្លូវអ៊ុតកៅស៊ូចាប់ពីសេះសទៅដល់ចំណុចរថយន្តចូលទៅចាក់ដីបានបែកនិងប្រេះខូចអស់ដោយសារទ្រទម្ងន់រថយន្តដឹកដីធ្ងន់លើសចំណុះនេះមិនបាន ។ ពេលនោះអាជ្ញាធរខេត្តក៏បានឱ្យផ្អាកសកម្មភាពមួយរយៈសិនដោយរង់ចាំផ្លូវស្ងួតទើបដំណើរ
ការដឹកដីបន្ត ។
ដោយសារតែពេលវេលាមានកំណត់មិនអាចទ្រាំឥតប្រយោជន៍ទៀតទើបនៅព្រឹកថ្ងៃទី២២ ខែវិច្ឆិកា ឆាំ្ន២០២១ រថយន្តដឹកដីមកពីក្រុមហ៊ុនផ្សេងៗគ្នាចំនួនជាង២០០គ្រឿងក៏ចាប់ផ្តើមដំណើរការបោះពួយដឹកអាចម៌ដីចេញពីជួរភ្នំព្រះយកទៅចាក់លុបសមុទ្រពង្រីកឆ្នេរសមុទ្រជាថ្មីទៀតឱ្យឆាប់ចប់ឱ្យឆាប់ហើយទោះបីផ្លូវមានស្ថានភាពអាក្រក់ក៏ដោយនៅថ្ងៃទី១ ខែធ្នូ ឆ្នាំ២០២១នេះគឺធ្វើផ្លូវបណ្ដើរដឹកអាចម៍ដីបណ្ដើរ៕
