ខេត្តកែប៖ ស្របពេលដែលរដ្ឋបាល ខេត្តកែប កំពុងតែមមាញ៉ឹក ក្នុងផែនការចាក់ដីពង្រីកទីតាំងឆ្នេរសមុទ្របន្ថែម ដែលមានប្រវែងរហូតដល់២,៧០០ ម៉ែត្រដើម្បីពង្រីកវិស័យទេសចរនោះ ក៍មានជនឆ្លៀតឱកាសនិយមមួយចំនួនតូចលួចចាក់ដីចូលសមុទ្រ និងចាក់ដីចូលតំបន់ព្រៃលិចទឹកដើម្បីធ្វើកម្មសិទ្ធិឯកជនផងដែរ ចំពោះករណីធ្វើបែបនេះ ត្រូវបានមតិមហាជនលើកឡើងថា គឺហាក់បីដូចកំពុងតែប្រណាំងប្រ
ជែងជាមួយនឹងគម្រោងរបស់រដ្ឋ ក្នុងគោលបំណងបម្រើចង់បានផលប្រយោជន៍ផ្ទាល់ខ្លួន។
សូមបញ្ជាក់ថា ទីតាំងមួយកន្លែងត្រូវបានអាជ្ញាធរក្រុង ធ្វើការហាមឃាត់ទាន់ពេលវេលា និងមួយទីតាំងទៀត អភិបាលស្រុកកំពុងតែត្រួតពិនិត្យព័ត៌មានលម្អិតជាមួយថ្នាក់ក្រោមរបស់ខ្លួន។
យោងតាមប្រភពដែលទទួលបានការលួចចាក់ដីពីរទីតាំងផ្សេងគ្នាខាងលើ បានឱ្យដឹងថា ទីតាំងទី១ មានជម្រៅប្រមាណ៥០ម៉ែត្រ និងទទឹងប្រមាណ៣០ម៉ែត្រ គឺស្ថិតនៅ ភូមិកែប ក្រុងកែប ខេត្តកែប។
ចំណែកមួយកន្លែងទៀតត្រូវគេចាក់ដីចូលក្នុងតំបន់ផលិតកម្មអំបិលគឺស្ថិតនៅ ភូមិភ្នំលាវ
ឃុំភ្នំលាវ ស្រុកដំណាក់ចង្អើ ខេត្តកែប។
លោកស្រី ទិត្យ សុខា អភិបាល ក្រុងកែប បានឱ្យអ្នកព័ត៌មានយើងដឹងនាពេលកន្លងទៅថា លោកស្រីបានឱ្យក្រុមការងារចុះទៅត្រួតពិនិត្យ និងដាក់កម្លាំងឃ្លាំមើលរួចហើយដោយសារតែការចាក់ដីនេះធ្វើឡើងនៅពេលយប់ ។ ទោះជាយ៉ាងនេះក្តី លោកស្រីមិនបានបញ្ជាក់អំពីវិធានការដាក់ទោសទាន់ដល់ជនអ្នកប្រព្រឹត្តកំហុសឆ្គងទៅតាមផ្លូវច្បាប់ឡើយ។
ចំពោះដីដែលបានចាក់ចូលក្នុងសមុទ្ររួចហើយនោះលោកស្រីបញ្ជាក់យ៉ាងខ្លីថា កំពុងស្វែងរកអត្តសញ្ញាណអ្នកនៅពីក្រោយ…តែរហូតមកដល់ម៉ោងផ្សាយថ្ងៃទី៣ខែមិនាឆ្នាំ២០២២នេះទៅហើយ អ្នកស្រីអភិបាលក្រុងរកមិនទាន់ឃើញនៅឡើយទេ។
ដោយឡែកការលួចចាក់ដីចូលក្នុងតំបន់ព្រៃលិចទឹក ជាដីផលិតកម្មអំបិលឯណោះវិញ លោក ប៊ុន យ៉ូង ប្រធានមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានបញ្ជាក់ថា ទីតាំងនេះជាដីឯកជនរបស់គេ ដែលបានស្នើសុំប្តូរប្រភេទដីរួលរាល់ហើយ ពោលលែងជាប្រភេទដីផលិតកម្មអំបិលទៀតហើយ។ តែការចាក់ដីនេះមានច្បាប់ ឬអត់ច្បាប់លោកមិនបានដឹងនោះទេ។
ប្រភពដែលអាចយកជាការបាន ដែលជាមន្ត្រីនៅ មន្ទីរដែនដី បានឱ្យអង្គភាពយើងដកស្រង់សម្ដីថា ដីឧហ្សាហកម្មអំបិលទាំងអស់មិនអាចដូរប្រភេទដីមកជាដីសាងសង់លំនៅដ្ឋានបាននោះទេ ទោះបីត្រូវប្តូរយ៉ាងណាក៍ដោយក៍នៅតែជាដីកសិកម្មដដែល។ ចុះចំឡែកអ្វីតែដីមួយកន្លែងនេះ ស្នើសុំដូរប្រភេទដីរួចរាល់តែអាចចាក់ដីបានទៅវិញ ?
លោកស្រី គឹម ចន្នី ចៅហ្វាយស្រុកដំណាក់ចង្អើរ ក៍បានលើកជាមតិយ៉ាងខ្លីថា លោកស្រីនឹងពិនិត្យការងារនេះជាមួយមន្ត្រីថ្នាក់ក្រោម ព្រោះលោកស្រីមិនចាំថាទីតាំងណាច្បាស់លាស់នៅឡើយទេ។
គួរបញ្ជាក់ផងដែរថា ករណីល្មើសច្បាប់ ដដែលៗនេះតែងតែកើតមានឡើង ចំណែកឯអាជ្ញាធរ មិនដែលមានវិធានការផ្លូវច្បាប់លើបុគ្គលអ្នកប្រព្រឹត្តឡើយ
លោក សោម ពិសិដ្ឋ អភិបាល ខេត្តកែប តែងតែរក្សាសភាពទន់ភ្លន់ជាមួយអ្នកប្រព្រឹត្តបទល្មើសជានិច្ច និងមិនដែលមានវិធានការច្បាប់ម្តងណាឡើយ។ ជាក់ស្តែងការរំកិលផ្លូវរដ្ឋ ការរៀបឃឿនចូលសមុទ្រនៅ តំបន់ឆ្នេរអង្កោល ករណីចាក់ដីរំលោភចូលដីដែនជម្រក់ជីវចម្រុះម៉ាត់ព្រែកអន្លុងធ្លក ករណីកាប់ទន្ទ្រានដីភ្នំបារាំង ជាដើមនោះ។ល។ កាលពីកន្លងទៅ កម្លាំងគណៈកម្មការចម្រុះដែលបានចុះទៅវាយកម្ទេចខឿនឆ្នេរអង្កោលនោះ ធ្វើបានតែបន្តិចបន្ទួចតែប៉ុណ្ណោះខណៈដែលរបងថ្មដូចគ្នាខ្ពស់ជាង២ម៉ែត្រ និងប្រវែងរាប់រយម៉ែត្រ នៅតែរក្សារៀងឈរយ៉ាងសង្ហារដដែល ៕
