ខេត្តកំពត៖ ប្រជាពលរដ្ឋដែលមានដីអាស្រ័យផលរាប់សិបហិតា ដែលស្ថិតនៅតាមបណ្តោយជើងភ្នំបូកគោ ត្រូវបានក្រុមការងារអន្តរក្រសួងសម្រេចមិនចុះពិនិត្យ ដោយចាត់ទុកជាដីរដ្ឋស្ថិតក្នុងឧទ្យានជាតិព្រះមុននីវង្សបូកគោ គ្មានដំណាំ គ្មានលំនៅដ្ឋាន និងចោទថា ជាទីតាំងដែលត្រូវបានរុករាន កាប់ឆ្កា ទន្ទ្រានកាន់កាប់ដោយខុសច្បាប់ ពោលគឺចាត់ទុក្ខថា ដីទាំងនោះភាគច្រើនប្រព្រឹត្តិក្រោយថ្ងៃទី៣ ខែកក្កដាឆ្នាំ២០២០ ចំពោះករណីសម្រេចចិត្តរបស់អន្តរក្រសួងខាងលើ បានមានប្រតិកម្មយ៉ាងខ្លាំងពីប្រជាពលរដ្ឋម្ចាស់ដីម្ចាស់ចំការខាងលើ ដោយពួកគាត់ទទូចស្នើសុំឲ្យក្រុមការងារមេត្តាចុះពិនិត្យឯកសារ ពិនត្យដីជាក់ស្ដែង និងជួបសម្ភាសន៍ជាមួយប្រជាពលរដ្ឋដោយផ្ទាល់សិន មុននឹងសម្រេចអ្វីមួយ ព្រោះការដែលក្រុមការងារលើកឡើងថា ប្រជាពលរដ្ឋទើបតែចូលទៅរុករាន កាន់កាប់នៅឆ្នាំ២០២០នោះ មិនត្រឹមត្រូវទេ ។
តាមផែនទីបង្ហាញទីតាំង គឺដីដែលត្រូវកំណត់ថា ជាដីរបស់រដ្ឋក្នុងឧទ្យានជាតិព្រះមុន្នីវង្សបូកគោនោះ គឺមានទំហំ៣២៤ហិចតានិង៤៨អា ស្មើនឹង៥ទីតាំងនៃផ្ទៃដីសរុប៥៧៦ហិចតានិង៧៥អា គ្របដណ្ដប់លើសង្កាត់ចំនួន២នៃក្រុងបូកគោ ។
ចំណែកលិខិតមួយច្បាប់របស់ក្រសួងបរិស្ថានលេខ១៩៤សណ បស ចុះថ្ងៃទី៣ ខែកុម្ភះឆ្នាំ២០២២ បានជម្រាបជូនអភិបាលខេត្តកំពត សុំចាត់តំណាងរដ្ឋបាលខេត្តកំពត មន្ត្រីជំនាញ រដ្ឋបាលក្រុងបូកគោ និងអ្នកពាក់ព័ន្ធឲ្យចូលរួមនៅក្នុងដំណើរការនិតិវិធីចុះពិនិត្យសិក្សានិងផ្ទៀងផ្ទាត់ទិន្ឋន័យផ្ទៃដីទំហំ៥៧៧ហិចតាដែលស្ថិតនៅក្នុងឧទ្យានជាតិព្រះមុនីវង្សបូកគោ ដើម្បីចុះបញ្ជីដីរដ្ឋជូនក្រសួងបរិស្ថាននិងចេញវិញ្ញាបនបត្រសម្គាល់សិទ្ធជួលអចិន្ត្រៃយ៍ជូនក្រុមហ៊ុនសុខាអូតែល ដោយយោងតាមអនុក្រិត្យលេខ១៨៤អនក្រ.បក ចុះថ្ងៃទី១២ ខែសីហាឆ្នាំ២០២១ និង លិខិតលេខ០៣៧ ស.អចុះថ្ងៃទី២៨ខែកក្កដាឆ្នាំ២០២១របស់ក្រុមហ៊ុនសុខាអូតែល បូកគោ។
បន្ទាប់មករដ្ឋបាលខេត្តកំពតក៏បានចេញសេចក្តីជូនដំណឹងលេខ០២៥\២២ស.ជ.ណ ចុះថ្ងៃទី៥ខែកុម្ភះឆ្នាំ២០២២ ស្តីពីការចុះធ្វើអត្តសញ្ញាណកម្មមនុស្សនិងអត្តសញ្ញាណកម្មដីដើម្បីកំណត់ដីដែលប្រជាពលរដ្ឋប្រើប្រាស់និងអាស្រ័យផលជាក់ស្ដែងនិងការចុះបញ្ជីដីរដ្ឋជូនក្រសួងបរិស្ថានមានទីតាំងក្នុងដីឧទ្យានជាតិព្រះមុនីវង្សបូកគោ ក្រុងបូកគោ ខេត្តកំពត ដោយយោងតាមលិខិតលេខ១៩៤ ស.ណ ប.ស្ថ ចុះថ្ងៃទី៣ ខែកុម្ភះឆ្នាំ២០២២ របស់ក្រសួងបរិស្ថាន ។
អ្វីដែលប្រជាពលរដ្ឋមិនអស់ចិត្តនោះគឺការចុះធ្វើអត្តសញ្ញាណកម្មមនុស្សនិងអត្តសញ្ញាណកម្មដីនៅតំបន់ជើងភ្នំបូកគោនោះ ពួកគាត់មិនបានដឹងនិងគ្មានការអញ្ជើញពីមន្ត្រីពាក់ព័ន្ធឡើយ ដោយឃើញក្រុមការងារគ្រាន់តែយកដ្រូនមកបង្ហោះរួចហើយ ក៏ឯកភាពមិនចុះពិនិត្យជាក់ស្តែង ដោយមិនបានមកជួបសម្ភាសន៍ប្រជាពលរដ្ឋ និង ពិនិត្យលើដីជាក់ស្ដែងនោះទេ ដូច្នេះការសម្រេចដាក់ដីរបស់ពួកគាត់ចូលជាដីរបស់រដ្ឋ ដោយសំអាងថា ជាទីតាំងដែលទើបចូលរុករាន កាប់ឆ្កា ក្រោយឆ្នាំ២០២០នោះ គឺពួកគាត់ទទួលយកមិនបានឡើយ ព្រោះដីចំការរបស់ពួកគាត់គឺបានមកពីកាន់កាប់ និងអាស្រ័យតាំងពីទសវត្សឆ្នាំ១៩៨០ ឬ ៩០ មកម្ល៉េះ ។
តែបើយោងតាមរូបមន្តស្បែកខ្លាដែលសម្ដេចតេជោហ៊ុនសែន ធ្លាប់ថ្លែងកន្លងមកបាន បញ្ជាក់ថា ដីដែលប្រជាពលរដ្ឋអាស្រ័យផលជាក់ស្ដែងទោះមាន សជណ មានដិកាដកហូត ឬស្ថិតក្នុងដីរដ្ឋក៏ត្រូវតែកាត់ឈ្វៀលជូនពួកគាត់ដែរ មិនត្រូវដកហូតពីប្រជាជន ហើយផ្ដល់ឲ្យក្រុមហ៊ុននោះទេ ។
ពាក់ព័ន្ធករណីមិនប្រក្រតីខាងលើនេះដែរ លោក នេត ភក្ត្រា រដ្ឋលេខាធិការក្រសួងបរិស្ថាន បានប្រាប់អ្នកព័ត៌មានយើងយ៉ាងខ្លីថា លោកគ្មានអ្វីត្រូវអត្ថាធិប្បាយច្រើននោះទេ ព្រោះក្រុមបច្ចេកទេសរបស់លោកកំពុងធ្វើការ ។
ប៉ុន្តែក្នុងពេលចុះបំពេញបេសកកម្មនោះលោក នេត ភក្ត្រា បានលើកឡើងថា សុំឲ្យប្រជាពលរដ្ឋយកឯកសារដែលពាក់ព័ន្ធមកបង្ហាញ ពោលគឺឯកសារស្របតាមច្បាប់មិនមែនឯកសារម៊ែកអាប់ឡើយ ។
ជុំវិញករណីខាងលើនេះក្រុមការងារយើងមិនអាចសុំការបំភ្លឺពីលោកដាញ់សារីប្រធានមន្ទីរដែនដីនគររូបនីយកម្មសំណង់និងសូរិយោដីខេត្តកំពតបានទេនៅព្រឹកថ្ងៃទី៨ខែមិនាឆ្នាំ២០២២នេះ ដោយទូរស័ព្ទចូល២ដងគ្មានអ្នកទទួលឡើយ ។ ចំណែកលោកហេងប៉ូឡូប្រធានមន្ទីរបរិស្ថានខេត្តកំពតក៏មិនអាចសុំសេចក្តីអត្ថាធិប្បាយបានដែរដោយទូរស័ព្ទខលចូលលោកថាជាប់រវល់ប្រជុំ៕
