(ខេត្តកែប) ៖ បើទោះបីជាសម្តេចតេជោប្រមុខរាជរដ្ឋាភិបាលនៃប្រទេសកម្ពុជាធ្លាប់ព្រមានចាត់ការអ្នកឃុបឃិតគ្នារំលោភយកដីរដ្ឋនិងបានចេញបញ្ជាអោយស្ថាប័ននិងក្រសួងពាក់ព័ន្ធចុះស្រាវជ្រៀវវែងមុខជនខិលខូចដែលទន្ទ្រានកាន់កាប់ដីព្រៃលិចទឹកក្នុងតំបន់បឹងទន្លេសាបជាសម្បត្តិសាធារណៈកាលពីថ្ងៃទី២៨ខែវិច្ឆិកាឆ្នាំ២០២១កន្លងទៅថ្មីៗហើយវិធានការក្តៅនេះត្រូវបានអនុវត្តនិងឃាត់ខ្លួនអ្នកដែលពាក់ព័ន្ធយកមកចាត់ការតាមផ្លូវច្បាប់អ្នកខ្លះក៏បានប្រគល់ដីជូនរដ្ឋវិញហើយអ្នកទៀតក៏កំពុងលាក់បាំងមិនព្រមចូលសារភាពនៅឡើង។
ទន្ទឹមនិងរឿងរ៉ាវរំលោភយករដ្ឋខាងលើនេះយើងក្រឡេកមកមើលដីព្រៃភ្នំវល្លិ៍ដែលជាគម្របព្រៃឈើដែលស្ថិតនៅចំណុចខាងត្បូងភ្នំក្រហមភូមិចំកាបីឃុំពងទឹកស្រុកដំណាក់ចង្អើរខេត្តកែបឯនេះ។ បច្ចុប្បន្នត្រូវបានក្រុមអ្នកមានលុយនិងមានអំណាចឃុបឃិតគ្នាទន្ទ្រានកាន់កាប់និងប្រម៉ូលទិញលក់យ៉ាងអនាធិបតេយ្យរឺឯអាជ្ញាធរស្រុកខេត្តនៅរក្សាភាពស្ងៀមស្ងាត់មិនទាន់មានវិធានការនៅឡើយ។
ប្រភពបានបង្ហើបថាក្រុមឈ្មួញដែលទន្ទ្រានកាន់កាប់ដីព្រៃគម្របព្រៃឈើដែលជាសម្បត្តិរដ្ឋដើម្បីយកមកធ្វើកម្មសិទ្ធបុគ្គលខ្លួននោះសុទ្ធសឹងតែជាអ្នកមានលុយនិងមានអំណាចនៅក្នុងទឹកដីខេត្តកែបដ៏តូចច្រឡឹងមួយនេះ។
សេចក្តីរាយការណ៍ដ៏ដែលនោះបានអោយដឹងថាមេឈ្មួញខាងលើបានបង្កើតសេនារីយោអោយមានការទិញលក់ដីព្រៃគម្របព្រៃឈើដោយអោយពលរដ្ឋម្នាក់ឈ្មោះចូវរស់នៅភូមិចំកាបីឃុំពងទឹកស្រុកដំណាក់ចង្អើរខេត្តកែបជាអ្នកដើរតួទន្ទ្រានកាន់កាប់ដីរដ្ឋខាងលើផ្ទាល់ដោយអាស្រ័យផលជាក់ស្ដែងលើដីនោះបន្ទាប់មកក៏ធ្វើការទិញលក់និងប្រើប្រាស់រូបភាពទិញដីអាស្រ័យផលពីពលរដ្ឋ។ប្រភពបន្ថែមថាបច្ចុប្បន្នដីព្រៃគម្របព្រៃឈើខាងលើត្រូវបានឈ្មោះចូវកាត់លក់ជាបន្តបន្ទាប់ចំនួនប្រមាណជាង១០ហិចតារីឯដីដែលសេសសល់ពីការលក់ទិញគេឃើញមានសាងសង់រោងសត្វពពែនៅលើចំរាក់ភ្នំវល្លិ៍នោះនឹងដាក់កាមេរ៉ាសុវត្ថិភាពទៀតផងដោយមានអ្នកមានអំណាចនៅក្នុងខេត្តចាំប្រើបាទដៃព្រះយូឡាយបាំងមេឃជួយការពារក្រែងមានឧបសគ្គមករារាំងរំខានដល់ការងារខាងលើ។
ជុំវិញករណីនេះឈ្មោះចូវបានឲ្យក្រុមការងារយើងដឹងតាមទូរសព្ទនៅព្រឹកថ្ងៃទី20ខែតុលាឆ្នាំ2022នេះថាលោកមិនបានទន្ទ្រានដីរដ្ឋដែលមានទំហំជាង 10ហិកតាដូចការចោទប្រកាន់នោះឡើយដោយបច្ចុប្បន្នមានសាងសង់រោងសត្វពពែនៅលើនោះស្រាប់ហើយដីនេះដែរលោកអាស្រ័យផលតាំងពីឆ្នាំ 2000 មកម្ល៉េះដោយកាលនោះលោកមិនបានធ្វើប្លង់រឹងនឹងគេដោយលោករវល់នៅក្រុងភ្នំពេញឈ្មោះចូវបញ្ជាក់ទៀតថាដីនោះលោកក៏មានលិខិតទទួលស្គាល់ពីមេភូមិដែហើយបើចង់ដឹងច្បាស់លោកបានបញ្ជាក់ថាឲ្យក្រុមការងារយើងទៅសួរលោកវង្សសុផលនាយខណ្ឌរដ្ឋបាលព្រៃឈើខេត្តកែបចុះព្រោះគេជាមន្ត្រីជំនាញហើយគេក៏បានចុះមកដល់ទីតាំងនេះដែរ។នៅពេលដែលក្រុមការងារអ្នកសារព័ត៌មានយើងសួររកឯកសារដើម្បីបញ្ជាក់ការពិតពីប្រវត្តិដីនោះឈ្មោះចូវថាជាប់រវល់តែបើទោះបីយ៉ាងនេះក្តីលោកថាចាំថ្ងៃរសៀលទើបទំនេរនឹងឱ្យពិនិត្យមើលជាក់ស្ដែងតែមកដល់ថ្ងៃទី21ខែតុលាឆ្នាំ2022ទៅហើយ។យើងក៏ពុំទាន់បានទទួលលិខិតផ្លូវការណាមួយពីឈ្មោះចូវនៅឡើយទេ។រីឯលោកកៅវន្ថាអនុប្រធានភូមិចំកាបីបានឲ្យដឹងថាបញ្ហារឿងនេះលោកពុំសូវដឹងច្បាស់ដែរតែគ្រាន់តែដឹងថាឈ្មោះចូវបានកាន់កាប់និងសាងសង់រោងពពែលើដីរដ្ឋពិតប្រាកដមែនតែចំនួនដីនោះមិនច្រើនទេប្រហែលជាមិនដល់មួយហិចតាផង!តែដីចំនួនប្រមាណជាជាង10ហិកតានៅខាងកើតដីរបឈ្មោះចូវកំពុងគ្រប់គ្រងនោះគឺជាដីរបស់ជំទាវម្នាក់នៅទីក្រុងភ្នំពេញហើយដីនោះក៏ជាដីគម្របព្រៃឈើផងដែ។
ចំណែកលោកឆាងឆៃអភិបាលស្រុកដំណាក់ចង្អើរថាចំពោះករណីនេះលោកអត់ទាន់បានដឹងទេ។ចាំលោកឱ្យក្រុមការងារចុះទៅមើល។នៅពេលអ្នកសារព័ត៌មានយើងបញ្ជាក់ថាតើក្រុមការងារនោះចុះទៅពេលណាលោកថាចាំឲ្យភូមិឃុំគេធ្វើការមុនសិន៕
