តាកែវ ÷ ថ្ងៃសុក្រ ១៤រោច ខែបុស្ស ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២០ ខែមករា ឆ្នាំ២០២៣នៅសាលាឃុំជ័យជោគ ស្រុកបូរីជលសារ ខេត្តតាកែវ បានប្រារព្ធមិទ្ទិញខួបអនុស្សាវរីយ៍ លើកទី៤៤ ទិវាជ័យជម្នះ ៧ មករា ឆ្នាំ២០២៣ (៧មករា ១៩៧៩-៧មករា ២០២៣) និងពិធីចុះហត្ថលេខាលើកិច្ចសន្យាប្រឡងប្រណាំង រវាងការិយាល័យបោះឆ្នោតក្នុងឃុំជ័យជោគ ស្រុកបូរីជលសារ ជាមួយការិយាល័យបោះឆ្នោតទាំង ១.៥៩៥ ទូទាំងខេត្តតាកែវ ក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៧ នាថ្ងៃអាទិត្យ ទី២៣ ខែកក្កដា ឆ្នាំ២០២៣ នៅមណ្ឌលខេត្តតាកែវ។
ក្រោមអធិបតីភាព លោក ទុយ សុភ័ក្ត្រ អភិបាលរង នៃគណៈអភិបាលខេត្តតាកែវ និងជាប្រធានក្រុមការងាររាជរដ្ឋាភិបាលចុះជួយមូលដ្ឋានឃុំជ័យជោគនិងលោក អ៊ុក សំនៀង អនុប្រធានក្រុមការងាររាជរដ្ឋាភិបាលចុះជួយមូលដ្ឋានឃុំជ័យជោគ។
និងមានការអញ្ជើញចូលរួមពី លោកអភិបាលរងស្រុក សមាជិកក្រុមប្រឹក្សាស្រុក លោកប្រធានការិយាល័យកសិកម្មធនធានធម្មជាតិនិងបរិស្ថាន លោកមេឃុំ ក្រុមប្រឹក្សាឃុំ លោកនាយប៉ុស្តិ៍នគបាលការពារព្រំដែន ឃុំ លោកមេបញ្ជាការយោធាការពារព្រំដែនឃុំ ប្រធានប៉ុសិ៍្តសុខភាព នាយប៉ុស្តិ៍នគរបាលរដ្ឋបាលឃុំ នាយកយកអនុវិទ្យាល័យ នាយកបឋមសិក្សា លោកគ្រូ អ្នកគ្រូ លោកមេភូមិ អនុប្រធានភូមិ សមាជិកភូមិ ចាស់ព្រឹទ្ធាចារ្យ ប្រជាការពារ និងបងប្អូនប្រជាពលរដ្ឋ។
លោកទុយសុភ័ក្ត្រអភិបាលរងនៃគណៈអភិបាលខេត្តតាកែវបានថ្លែងថា ថ្ងៃ៧មករា មិនមែនជាថ្ងៃសម្រាប់តែគណបក្សប្រជាជននោះទេ ថ្ងៃ៧មករា គឺជាថ្ងៃអបអរសាទរ ជាថ្ងៃដែលគេទទួលស្គាល់ថាជាប្រវត្តិសាស្ត្រដែលយើងរស់ឡើងវិញ ដែលថ្ងៃ៧មករានេះឈានចេញពីគណបក្សប្រជាជនកម្ពុជាចូលទៅដល់ថ្នាក់ជាតិ ដឹកនាំរួម អបអរសាទររួម ជាថ្ងៃដែលប្រជាពលរដ្ឋទាំងមូលទទួលស្គាល់ថាជាថ្ងៃរួចផុតពីរបបប្រល័យពូជសាសន៍ ដូច្នេះចំណុចនេះសមាជិកគណៈបក្ស សមាជិករាជរដ្ឋាភិបាល ត្រូវតែហ៊ាននិយាយ ត្រូវតែហ៊ានទទួលស្គាល់ការពិត ថាយើងបាត់បង់ជីវិត បាត់បង់បងប្អូន បាត់បង់សមាជិកទាំងអស់ ព្រោះប៉ុលពតជាអ្នកក្តាប់ទ័ព ជាអ្នកសំលាប់យើង។
ថ្លែងក្នុងពិធីនេះដែរលោកអ៊ុកសំនៀងបានមានប្រសាសន៍ថា ចាំបាច់យើងទាំងអស់គ្នាមន្ត្រីរាជការ យុវជនចូលរួមក្នុងការបោះឆ្នោត ហើយការបោះឆ្នោតនេះ យើងនៅក្នុងគណបក្សប្រជាជនយើងត្រូវតែមានការណែនាំច្បាស់លាស់ ដើរជាជំហានការណែនាំរបស់គណបក្សថ្នាក់កណ្ដាល និងថ្នាក់ខេត្តដើម្បីចូលរួមទាំងអស់គ្នាដោយដាស់តឿនដល់អ្នកដែលទៅចុះឈ្មោះបោះឆ្នោត អោយបោះជូនគណបក្សប្រជាជនកម្ពុជានិងអាចបន្តការងារ០៧មករាបាន ហើយយើងអាចបន្តអភិវឌ្ឍន៍ប្រទេសអោយជឿនលឿនបាន។
លោកបានបន្តថា មកដល់ពេលប្រទេសមានសុខសន្តិភាពគឺសុខទុក្ខរបស់បងប្អូនប្រជាពលរដ្ឋក៏ដូចជាសុខទុក្ខរបស់ថ្នាក់ដឹកនាំដែរ។ យើងមានសិទ្ធិសេរីភាពសព្វបែបយ៉ាង រាប់តាំងពីសិទ្ធគោរពប្រតិបត្តិតាមប្រពៃណី ទំនៀមទម្លាប់ សាសនា សព្វបែបយ៉ាង ដែលនៅក្នុងសម័យខ្មែរក្រហមមិនមានឡើយ សូម្បីការអប់រំ។ ការអប់រំយើងមានតាំងពីកម្រិតកុមារតូច ថ្នាក់បឋម រហូតដល់ឧត្តមសិក្សា និងក្រោយឧត្តមសិក្សា។ ទាំងអស់នេះ គឺជាអ្វីដែលយើងបានឃើញអំពីការប្រែប្រួលនៃសិទ្ធិផ្នែកស្មារតី។ រីឯផ្នែករូបវ័ន្តវិញ អ្វីៗដែលយើងបានឃើញនៅពេលនេះ រួមមាន ស្ពាន ផ្លូវ ថ្នល់ សាលារៀន មន្ទីរពេទ្យ វត្តអារ៉ាម សំណង់អគារតូចធំរីកដូចផ្សិត ភាពស៊ីវិល័យនៃជីវភាពរស់នៅរបស់ប្រជាពលរដ្ឋ ជាដើម គឺមិនមែនជាការប្រទានរបស់អាទិទេពទេ តែវាកើតឡើងពីការខិតខំប្រឹងប្រែងរបស់រាជរដ្ឋាភិបាល។
ក្រោយបញ្ចប់កម្មវិធីលោក ទុយ សុភ័ក្ត្រ បានប្រគល់ ខោ អាវ មួក ស្លាកឈ្មោះ និងខ្សែក្រវ៉ាត់ ប្រជាការពារ ចំនួន ១៥កំផ្លេ និង លោក អ៊ុក សំនៀង បានចែកថវិកា ជូនសមាជិក សមាជិកា ក្នងម្នាក់ៗថវិកា ១០.០០០រៀល ផងដែរ។ដោយអ្មកស្រីត្រេ ស្រីមុំ
