(ឧត្តរមានជ័យ)៖ ដើម្បីចូលរួមជាមួយរាជរដ្ឋាភិបាល និងលើកទឹកចិត្តវីរយុទ្ធជននៅសមរភូមិមុខ និងប្រជាពលរដ្ឋរងគ្រោះដោយសង្គ្រាមឈ្លានពានពីសំណាក់ទ័ពថៃ សប្បុរជនមួយក្រុមនៅរាជធានីភ្នំពេញ នៅព្រឹកថ្ងៃទី២ ខែសីហា ឆ្នាំ២០២៥ បាននាំយកនូវគ្រឿងឧបភោគបរិភោគ ថវិកា ឧបត្ថម្ភដល់វីរកងទ័ពដែលកំពុងឈរជើងការពារតាមព្រំដែនយ៉ាងអង់អាចក្លាហាន នៅខេត្តឧត្តរមានជ័យ និងខេត្តបន្ទាយមានជ័យ។
សប្បុរជនទាំងអស់ដែលបានអញ្ជើញចុះមកផ្ទាល់ បានថ្លែងលើកទឹកចិត្ត និងថ្លែងអំណរគុណយ៉ាងជ្រាលជ្រៅជាទីបំផុតដល់វីរៈយុទ្ធជនទាំងអស់ដែលបាននិងកំពុង លះបង់អាយុជីវិតការពារបូរណភាពទឹកដីនៅក្នុងសមរភូមិ រហូតទទួលបានជ័យជំនះជាប្រវត្តិសាស្ត្រនាពេលថ្មីៗកន្លងទៅនេះ និងបន្តការពារបូរណភាពទឹកដីយ៉ាងរឹងមាំទៀតផង។
ជាមួយគ្នានេះ សូមប្រសិទ្ធិពរជ័យដល់វីរៈយុទ្ធជនដ៏អង់អាចក្លាហានរបស់យើងទាំងអស់ ដែលកំពុងលះបង់សាច់ស្រស់ឈាមស្រស់ការពារបូរណភាពទឹកដីនៅគ្រប់គោលដៅ តាមបណ្ដោយព្រំដែនខ្មែរ-ថៃ យ៉ាងអង់អាចក្លាហាន សូមឱ្យជួបតែសេចក្តីសុខ និងមានជ័យជម្នះនៅលើសមរភូមិគ្រប់ពេលវេលា។
សូមបញ្ជាក់ថា សប្បុរជនដែលមកពីរាជធានីភ្នំពេញ រួមមាន៖ ឧបាសិកា ធឹង ណយ លោក សួន វិជ្ជា និងអ្នកស្រី សួន សុខនាង ព្រមទាំងបុត្រ លោក តាក់ ណាង និងអ្នកស្រី ស៊ុយ ងួនអ៊ាង លោក តែន ចាន់ និងអ្នកស្រី ស៊ុយ ងួនអេង លោក ស៊ុយ ងួនសេង និងភរិយា។ចំពោះសម្ភារដែលចែកជូនរួមមាន៖កាហហវេ២កេស ទឹកដោះគផ២កេស ទឹកត្រី៣៥យួរ ទឹកស៊ីអ៊ីវ៣៥យួរ មី៣៤កេស សាប៊ូ១២កេស ស្ករគ្រាប់១កេស ស្ករ២កេស ក្រម៉ា៥០ និងថវិកាចែកជូនកងទ័ព សរុបប្រមាណ៤០លានរៀល៕
