លោក ហោជិន វីរៈយុទ្ធ អភិបាលស្រុកអន្លង់វែង ខេត្តឧត្តរមានជ័យ បានថ្លែង នៅក្នុងពិធីក្រុងពិលី និងសម្ភាសន៍បើកការដ្ឋានសាងសង់ផ្ទះវីឡាក្រុមហ៊ុន ហ៊ុន ហេង រៀលធី ខូអិលធីឌី នារសៀលថ្ងៃទី២៥ ខែធ្នូ ឆ្នាំ២០២០ ស្ថិតនៅភូមិអូរជញ្ជៀន ឃុំអន្លង់វែង ស្រុកអន្លង់វែង ខេត្តឧត្តរមានជ័យ ដែលការអញ្ជើញចូលរួមពីសំណាក់អាជ្ញាធរមូលដ្ឋាន និងតំណាងក្រុមហ៊ុន។
លោក ហោជិន វីរៈយុទ្ធ អភិបាលស្រុកអន្លង់វែង បានលើកឡើងថា ស្រុកអន្លង់វែង គឺជាតំបន់សមរភូមិចុងក្រោយបង្អស់ នៃសង្គ្រាមខ្មែរក្រហម (តាម៉ុក)។ ក្រោមការដឹកនាំដ៏ឈ្លៀសវៃ និងនយោបាយឈ្នះឈ្នះ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្របានបង្រួបបង្រួមប្រទេសជាតិអោយមានសុខសន្តិភាព ស្ថេរភាពនយោបាយ និងការអភិវឌ្ឍន៍។ ដូច្នេះហើយអន្លង់វែង បានទទួលសមាហរណកម្មនាឆ្នាំ១៩៩៨ ដែលសម្តេចតេជោបានយកចិត្តទុកដាក់ខ្ពស់ចំពោះប្រតិបត្តិករ ដោយមិនទុកចោលអ្នកណាម្នាក់ឡើយ។
លោកអភិបាលបានបន្តថា តំបន់អន្លង់វែង ខេត្តឧត្តរមានជ័យ គឺជាសមរភូមិបង្ហូរឈាមចុងក្រោយ ដែលរហូតមកសល់បច្ចុប្បន្នស្រុកអន្លង់វែងបានប្រែមុខមាត់ថ្មី សំបូរទៅដោយការច្រៀងរាំ និងពោពេញទៅដោយសម្លេងធម៌ និងអភិវឌ្ឍន៍រីកចំរើន មានផ្លូវថ្នល់ សាលារៀន មន្ទីរពេទ្យ វត្តអារាម ជាដើម បានកើតឡើងនៅគ្រប់ទីកន្លែង។
លោកបន្តថា ការសាងសង់ផ្ទះវីឡា គឺជាសមទ្ធិផលថ្មីមួយទៀត នៅលើទឹកដីស្រុកអន្លង់វែង ដែលក្រុមហ៊ុន ហ៊ុន ហេង រៀលធី ខូអិលធីឌី បាននឹងរៀបចំការដ្ឋានសាងសង់ ដែលជាការចូលអភិវឌ្ឍន៍នៅតំបន់យើងអោយមានការរីកចំរើន ហើយអាចអោយប្រជាជន ដែលមានជីវភាពសមរម្យទិញផ្ទះប្រភេទវីឡា បង់រំលោះ ឬទិញផ្តាច់ បានរស់នៅដូចអ្នកទីក្រុងដែរ ៕
