(ខេត្តកែប) ៖ លោក ហង្ស សុភាព ភ្នាក់ងារយកព័ត៌មានប្រចាំខេត្តកែប និងកំពត ត្រូវបានលោក ថាច់ សំបូរ មេបនល្បែងស៊ីសងប្រជល់មាន់តាមអនឡាញ និងក្រុមអ្នកញៀនល្បែងរួមអាជីពប៉ុនប៉ងមនុស្សឃាតមិនបានសម្រេច ហើយបង្វែររឿងទៅជាគ្រោះចរាចរណ៍ទៅវិញ។
ហេតុការណ៍នេះបានកើតឡើងនៅរសៀលថ្ងៃទី២២ ខែសីហា ឆ្នាំ២០២១ ស្ថិតនៅចំណុចភូមិចំកាបី ឃុំពងទឹក ស្រុកដំណាក់ចង្អើរ ខណៈពេលអ្នកកាសែតខាងលើរូបនេះចុះថតផ្តិតយករូបភាពអំពីសកម្មភាពការជួបជុំគ្នាលេងល្បែងស៊ីសងជល់មាន់តាមទូរទស្សន៍នៅផ្ទះឈ្មោះ បូររ៉ាមី ត្រូវជាកូនប្រុសបង្កើតរបស់លោក ថាច់ សំបូរ មេបនល្បែងដុះស្លែរនៅក្នុងអាណាចក្រខេត្តកែបមួយនេះ។
ទីតាំងបនល្បែងស៊ីសងនេះភ្នាល់ម្តងៗដាក់លុយរាប់ពាន់ដុល្លានោះ ស្ថិតនៅចំណុចភ្នំវល្លិ៍ ភូមិចំកាបី ឃុំពងទឹក ស្រុកដំណាក់ចង្អើរ ត្រូវគេដឹងថា មានអាយុកាលបើកលេងភ្នាល់ជាងមួយទសវត្សមកហើយ មិនដែលមានសមត្ថកិច្ចពាក់ព័ន្ធនៅក្នុងខេត្តកែបហ៊ានចេញមុខបង្ក្រាប់ឡើយ ។ បើទោះជាប្រមុខរាជរដ្ឋាភិបាលក៏ដូចជាក្រសួងសុខាភិបាលចេញបំរាមយ៉ាងតឹងរឹងហាមការជួបជុំខណៈពេលជម្ងឺកូវិត ១៩ វាយលុកក្នុងសហគមន៍យ៉ាងធ្ងន់ធ្ងក្តីក៏ទីតាំងបនល្បែងខាងលើនេះ នៅតែដំណើរការយ៉ាងរលូនដ៏ដែល។
ជុំវិញករណីខាងលើនេះ លោកវរៈសេនីយ៍ទោ តូវ សុវណ្ណអធិការ នគរបាលស្រុកដំណាក់ចង្អើរបានអោយក្រុមការងារដឹងយើងតាមទូរស័ព្ទនៅព្រឹកថ្ងៃទី២៣ ខែសីហា ឆ្នាំ២០២១នេះថា ចំពោះទីតាំងបនល្បែងខាងលើ និងឈ្មោះ ថាច់ សំបូរ លោកធ្លាប់ហៅមកធ្វើកិច្ចសន្យាម្តងហើយអំពីរឿងនេះតែពួកគេនៅបន្តលេងទៀតលោកអត់ដឹងទេព្រោះលាកកំពុងជាប់ចត្តាឡីស័ក ។ តែយ៉ាងណាក៏ដោយ លោក ហង្ស សុភាព បានបញ្ជក់ថា «លោកកំពុងរៀបចំឯកសារដាក់ពាក្យបណ្តឹងទៅសាលាដំបូងខេត្តដើម្បីរកយុត្តិធម៌តាមផ្លូវច្បាប់»៕
