(ខេត្តកែប) ៖ ប្រជាពលរដ្ឋ ៧ គ្រួសារជាម្ចាស់ដីនិងពលរដ្ឋជាច្រើននាក់ផ្សេងរស់នៅភូមិផងរបងជាមួយផ្ទុះការតវ៉ាខណៈពេលកម្លាំងគនរបាលនៃស្នងការរដ្ឋានខេត្តកែបចុះទៅអនុវត្តការរុះរើរបងដីនៅរព្រឹកថ្ងៃទី៧ខែកញ្ញាឆ្នាំ២០២១ដែលស្ថិតនៅភូមិអំពេញឃុំអង្កោលស្រុកដំណាក់ចង្អើរតែប្រតិបត្តិការនោះត្រូវបរាជ័យ។
លោកយាយ យិត ញ៉ អាយុ៧៥ឆ្នាំ ជាពលរដ្ឋអាស្រ័យលើដីនោះតាំងឆ្នាំ១៩៧៩ មក និងបានចែកអោយកូនៗកាន់កាប់បន្ត មកដល់បច្ចុប្បន្ន បានរៀបរាប់ថា គាត់ជាស្ត្រីមេម៉ាយតាំងពីកូនៗនៅតូចៗ ដោយបានអាស្រ័យដោយកាប់ដើមចាក លើដីនោះយកទៅលក់ ដើម្បីចិញ្ចឹមជីវិតចាប់តាំងពីរបបកម្ពុជាប្រជាធិបតេយ្យ ដឹកនាំដោយពលពតដួលរលំមក គាត់និងកូនៗរស់នៅដោយសុខសន្តិភាពក្រោយការដឹកនាំរបស់គណៈបក្សប្រជាជនកម្ពុជាដែលមានសម្តេចតេជោ ហ៊ុន សែន ជាប្រមុខ ។ តែមិនស្មានដល់ថា ពេលថ្មីៗនេះក៏មានកម្លាំងនគរបាលមកអោយគាត់រុះរើរបងចេញពីដីដោយអះអាងថាដីនោះគេមានប្លង់កម្មសិទ្ធគេលក់អស់ហើយ ។ និងមានសមត្ថកិច្ចខ្លះទៀតថា គាត់រំលោភយកដីរដ្ឋនិងបង្ខំអោយរុះរើរបងចេញ។
អ្នកស្រី អ៊ីវ ផេន ត្រូវជាកូនម្នាក់ក្នុងចំណោមកូនចំនួន ៧ នាក់ ដែលទទួលដីកេរ្តិ៍ ពីលោកយាយខាងលើបានបញ្ជាក់ថាដីដែលគេព្យាយាមរំលោភយកសព្វថ្ងៃមានចំនួនជាងកន្លះហិកតាប៉ុណ្ណោះ គាត់បានអាស្រ័យផលតពីម្តាយជាង ៣០ ឆ្នាំ មកហើយ រហូតមកដោយមិនមានអ្នកណាមកហាមឃាត់ឡើយ ។
ស្រាប់តែនៅឆ្នាំ២០២០ មានបុរសម្នាក់ឈ្មោះត្រេវរស់ភូមិទួលស្រង៉ាំមកសុំទិញក្នុងតម្លៃ៥០០០ដុល្លា ក្រោយមកអោយតម្លៃ១០០០០ដុល្លា ក៏ខាងអ្នកស្រីមិនលក់ទៀត ហើយបន្ទាប់មកអោយតម្លៃក្នុងមួយម៉ែត្រការ៉េ៥ដុល្លាខាងអ្នកស្រីក៏ព្រមលក់តែខាងគេអត់ទិញវិញ។ហើយក៏ស្ងាត់ទៅ ស្រាប់តែក្នុងខែសីហាឆ្នាំ២០២១កន្លងទៅថ្មីៗនេះ ខាងសមត្ថកិច្ចបានចោទក្រុមគ្រួសារអ្នកស្រី(អ៊ីវផេន)និងបងប្អូនគាត់ថាបានបោះបង្គោលរបងរំលោភយកដីរដ្ឋ និងអោយផ្តិតមេដៃទទួលស្គាល់តែគាត់អត់ព្រម ។ បន្ទាប់មកខាងអធិការស្រុកដំណាក់ចង្អើរហៅប្តីអ្នកស្រីទៅសួរនាំរឿងដីខាងលើតែមិនសួរនាំបែជាអោយពិនិត្យទឹកនោមដើម្បីរកសារធាតុញៀនទៅវិញតែលទ្ធផលអវិជ្ជមាន។
អ្នកស្រី អ៊ីវ ផេន បន្តថា ក្រោយពីមានការធ្វើទុក្ខបុកម្នេញនិងតាមរកកំហុសមិនចេះចប់មិនចេះហើយពីសំណាប៉ូលីសស្រុកនិងខេត្ត។ស្រាបតែមានបុគ្គលម្នាក់ទៀតឈ្មោះម៉េងសាំងអ្នកធ្វើការនៅភ្នំពេញមកគំរាមថាដីនេះគេអោយតម្លៃ២០០០០ដុល្លាបើមិនព្រមលក់ដីខាងលើនេះទេរឿងនេះមិនចប់ឡើយព្រោះដីនេះគេបានលក់អោយជំទាវម្នាក់រស់នៅខេត្តកែបរួចទៅហើយ ។
លោអនុសេនីយ៍ឯក ស៊ី ផាន អធិការរងនគរបាលស្រុកដំណាក់ចង្អើរបានអោយដឹងថា លោកមកនេះគឺយោងតាមបណ្តឹងពលរដ្ឋផ្សេងទៀតជាម្ចាស់ដីព្រោះគេមានប្លង់កម្មសិទ្ធ ។ តែទោះយ៉ាងណាក៏ដោយក្រុមការងារយើងមិនអាចស្វែងរកភាគីម្ខាងទៀតដែលសមត្ថកិច្ចបានអះអាងថាមានប្លង់កម្មសិទ្ធិថាជាអ្នកណានោះឡើយព្រោះឋិតក្នុងភាពអាថ៌កំបាំង ។
រីឯលោក ទិន បេន មេឃុំស្តីទីឃុំអង្កោលនិងលោកស្រី គឹម ចន្នី អភិបាលស្រុកដំណាក់ចង្អើរបានអោយក្រុមការយើងដឹងតាមទូរស័ព្ទនៅព្រឹកថ្ងៃទី៨ ខែកញ្ញា ឆ្នាំ២០២១នេះ ថាចំពោះការចុះអនុវត្តខាងលើនោះពួកគាត់អត់បានដឹងទេព្រោះខាងនគរបាលគេអត់ប្រាប់ព្រោះគេជាថ្នាក់ខេត្ត។
ចំណែកលោកឧត្តមសេនីយ៍ទោ សម្បត្តិ សុធារដ្ឋ ស្នងការនគរបាលខេត្តកែបបានថ្លែងថា កម្លាំងលោកទៅកន្លែងទីតាំងដីនោះមិនមែនទៅរុះរើរបងដីពលរដ្ឋទេ គឺទៅដើម្បីការពារសន្តិសុខ ខ្លាចក្រែងភាគីជម្លោះដីនោះផ្ទុះអំពើហិង្សា និងយោងតាមបណ្តឹងពលរដ្ឋមួយ ។ ចំពោះរឿងនេះ លោកថានិងក៏សាងសំណុំរឿងទៅតុលាចាត់ការបន្តតាមនីតិវិធី។
ទោះបីយ៉ាងនេះក្តីក៏ដោយ ពលរដ្ឋនៅក្នុងហេតុការនោះបានដាក់ការសង្ស័យថាការអនុវត្តច្បាប់ខាងលើមានភាពមិនប្រក្រតីកំពុងឋិតក្នុងវាំននខ្មៅនៅឡើយ ៕
