(ខេត្តកំពត) ៖ ដោយសារភាពលោភលន់គ្មានដែនកំណត់បានធ្វើអោយមនុស្សមួយវង្វេងលែងស្គាល់បុណ្យបាប សូម្បីតែដីផ្លូវក៏ចេះបំពានយកដែរ ដោយរឿងទំនាស់ដីផ្លូវ មួយកន្លែងនៅភូមិទ្វីខាងជើង សង្កាត់អណ្ដូងខ្មែរ ក្រុងកំពត ត្រូវបានពលរដ្ឋរងគ្រោះអត់ផ្លូវរិះគន់ លោកគឹមសាមឿន ដែលមានតួនាទីជាប្រធានការិយាល័យថាមពលនៃមន្ទីររ៉ែខេត្តកំពត ថាជាមនុស្សបាត់បង់គុណធម៌ដោយមិនខ្លាចបាបកម្មអ្វីសោះឡើយនិងហ៊ានក្បត់ពាក្យសន្យាក្នុងការដូរដីជាមួយពលរដ្ឋមួយគ្រួសារឈ្មោះកៅ អិត ដោយសន្យាថា លោកសុំយកមកធ្វើជាផ្លូវសារធារណៈបម្រើអោយប្រយោជន៍ពលរដ្ឋទូទៅក៏ដូចជាពលរដ្ឋដែលមានដីបំរ៉ុងនិងសង់លំនៅដ្ឋាននៅខាងក្រោយដែលមិនមានផ្លូវដើរ។
ក៏ប៉ុន្តែលោកគឹម សាមឿន បន្ទាប់ពីបានសុំដីលោកយាយកៅ អិតចំនួន៤ ម៉ែត្រ បែជាលោកក្រឡះសម្តីលួចធ្វើប្លង់យកទាំងផ្លូវលក់អោយអ្នកផ្សេងធ្វើប្រងើយ ចំពោះករណីលោកគឹម សាមឿន លក់អោយអ្នកទី៣នេះ ត្រូវបានគឺធ្វើរបងថ្មព័ទ្ធជិតមិនអោយពលរដ្ឋដែលធ្លាប់អាស្រ័យដើរលើផ្លូវនោះចេញចូលបានឡើយ។
បើយោងតាមបណ្តឹងចុះថ្ងៃទី៨ខែកក្កដាឆ្នាំ២០២១របស់ពលរដ្ឋឈ្មោះកៅ អុិតភេទស្រីអាយុ៦០ឆ្នាំហើយលោកយាយ បានប្តឹងទៅការិយាល័យភូមិបាលក្រុងកំពត ដេីម្បីជំទាស់ក្បាលដីលេខ៥៦៥របស់ឈ្មោះគឹម សាមឿន ភេទប្រុសអាយុ៥០ឆ្នាំរស់នៅភូមិទ្វីខាងជើងសង្កាត់អណ្តូងខ្មែរក្រុងកំពតខេត្តកំពត មិនអោយកាត់ក្បាលដីខាងលើលក់អោយអ្នកផ្សេងទៀតឡើយ ដើម្បីធានាបានភាពត្រឹមត្រូវតាមការព្រមព្រៀងរវាងលោកយាយនិងលោកគឹម សាមឿន ដែលធ្លាប់បានដោះដូរដីនិងគ្នាស្ថិតនៅភូមិសង្កាត់ខាងលើនាពេលកន្លងមកនោះអោយមានភាពយុត្តិធម៌ឡើងវិញ។
បើយោងតាមខ្លឹមសារនៃពាក្យបណ្តឹងលោកយាយកៅអុិតបានបញ្ជាក់ថាលោកគឹម សាមឿន មិនគោរពតាមការសន្យាឡើយកាលនោះនៅខែមេសាឆ្នាំ២០១៦ដីលោកគឹម សាមឿន នៅខាងក្នុងអត់ផ្លូវចេញចូលចំណែកដីលោកយាយកៅអុិតនៅខាងក្នុងផងនៅខាងក្រៅផង ហើយដីលោកយាយនៅខាងក្រៅនោះមានផ្លូវចូលចាស់ស្រាបក្រោយមកលោកគឹមសាមឿនសុំដូរយកដីគាត់ដែលមានផ្លូវដោយសន្យាថាទុកផ្លូវនោះនៅដ៏ដែល ដើម្បីអោយពលរដ្ឋផ្សេងទៀតនៅខាងក្នុងអាចចេញចូលដូចធម្មតា។
តែអ្វីដែលហួសចិត្តនឹកស្មានមិនដល់នោះ ក្រោយពីដូរដីធ្វើផ្លូវបានហើយ បែជាលោកគឹមសាមឿន មានចិត្តលោភលន់ត្រូវរ៉ូវជាមួយមន្ត្រីវាស់វែងដី លួចវាស់ធ្វើប្លង់និងបិតផ្លូវដែលជាហេតុធ្វើអោយពលរដ្ឋដែលធ្លាប់អាស្រ័យលើផ្លូវនោះផ្ទុះការតវ៉ារហូតឈានដល់ប្តឹងផ្តល់គ្នាមកដល់នាពេលបច្ចុប្បន្ននេះ។ ដោយទទួលរងភាពអយុត្តិធម៌ខុសការពិតលោកយសយកៅ អិតកើតទុក្ខមិនសុខចិត្តលោកយាយថា ការនិយាយគ្នាពីខាងដើមថាសុំដោះដូរដីធ្វើផ្លូវ ដល់ចុងក្រោយបែជាលោកគឹម សាមឿនលក់អោយគេធ្វើរបងបិតផ្លូវទៅវិញ។
លោកប៊យមេភូមិទ្វីខាងជើងបានទទួលស្គាល់ថា ករណីដោះដូរដីរវាងលោកយាយកៅអុិតនិងលោកគឹមសាមឿន ដើម្បីធ្វើផ្លូវចេញចូលនោះ គឺជាសាក្សីដឹងឭរឿងនេះពិតមែន ក៏ប៉ុន្តែការសុំធ្វើផ្លូវនោះ មិនបានធ្វើជាលាយលក្ខអក្សរទេ គឺនិយាយផ្ទាល់មាត់ ព្រោះអ្នកទាំងបាននិយាយនៅផ្ទះលោក។
ជុំវិញការចោទប្រកាន់ខាងលើលោកគឹមសាមឿនប្រធានការិយាល័យថាមពលនៃមន្ទីររ៉ែនិងថាមពលខេត្តកំពត បានអោយអង្គភាពសារព័ត៌មានម្លប់សន្តិភាពយើងដឹងនៅព្រឹថ្ងៃទី១៥ខែតុលាឆ្នាំ២០២១នេះថាលោកមិនបានប្រព្រឹត្តដូចការចោទនោះទេ តែលោកថាពិតជាបានដូរដីជាមួយលោកយាយកៅអិតមែន ដោយដោះដូរស្មើការ៉េគ្នា រីឯការធ្វើផ្លូវបើមានការអភិវឌ្ឍន៍ធ្វើលោកនិងអោយ បើគ្មានទេលោកយកដីនោះវិញព្រោះលោកមានប្លង់កម្មសិទ្ធជាដីលោកស្របច្បាប់។
ចំណែកលោកបេងសំណាងប្រធានការិយាល័យភូមិបាលក្រុងកំពតអង្គភាពសារព័ត៌មានយើងមិនអាចសុំការបំភ្លឺបានទេដោយទូរស័ព្ទខលចូលអត់មានអ្នកទទួល។
ដោយឡែកលោកលាងរឿនសុធីអភិបាលក្រុងកំពតថាចាំលោកអញ្ជើញអភិបាលរងទទួលបន្ទុកសុំយោបល់សិនព្រោះការងារយើងធ្វើតាមឋានានុក្រមលោកបញ្ជាក់ថាបច្ចុប្បន្នរឿងនៅក្នុងក្រុងកើតឡើងច្រើន៕
