ស្រីម្នាក់ដែលត្រូវបានគេស្គាល់ថា ជាឈ្មួញឈើរកស៊ីឈើជាយូរឆ្នាំ ដែលតែងតែដើរទិញឈើថ្មី ដាក់ត្រាំទឹក រួចហើយដំដែកគោលបន្លំធ្វើជាឈើចាស់ ដើម្បីដឹកជញ្ជូនបន្លំភ្នែកសមត្ថកិច្ចថា ជាឈើផ្ទះចាស់ ដែលត្រូវបានឯកឧត្ដមព្រះរាជអាជ្ញាខេត្តឧត្តរមានជ័យ បញ្ជាឲ្យសមត្ថកិច្ចឃាត់ខ្លួន ព្រមទាំងមនុស្ស២នាក់ទៀត ដែលជាតែកុងរថយន្ត និងព្រូរថយន្ត។
ការឃាត់រថយន្តរបស់ស្ត្រីដែលជាឈ្មួញឈើថ្មីដំដែកគោលបន្លំជាឈើចាស់ បានធ្វើឡើងបន្ទាប់ពីសមត្ថកិច្ចចុះល្បាត កាលពីយប់ថ្ងៃទី២២ ខែតុលា ឆ្នាំ២០២១ នៅចំណុចអូរលុងស្ថិតនៅក្នុងភូមិថ្នល់ថ្មី ឃុំអន្លង់វែង ស្រុកអន្លង់វែង ខេត្តឧត្តរមានជ័យ ក៏ប្រទះឃើញរថយន្តដឹកឈើចាស់របស់ឈ្មួញឈ្មោះ ឆន សារ៉េន ហៅអ៉ីកុក ដែលជាមុខសញ្ញាដឹកឈើដែលត្រូវបានមន្ត្រីជំនាញរដ្ឋបាលព្រៃឈើបង្ក្រាបកន្លងមក។ ទើបសមត្ថកិច្ចរាយការណ៍ទៅឯកឧត្ដម តូច ភក្តី ព្រះរាជអាជ្ញាខេត្តឧត្តរមានជ័យ បញ្ជាឲ្យរថយន្តឃាត់ដើម្បីធ្វើការត្រួតពិនិត្យ ហើយសមត្ថកិច្ចរកឃើញពីភាពមិនប្រក្រតីនៃការដឹកឈើចាស់ជាប្រភេទឈើត្រាំទឹកដំដែកគោល ទើបឯកឧត្ដមព្រះរាជអាជ្ញាបញ្ជាឲ្យនាំយករថយន្តដឹកឈើ
ទៅដាក់ស្នាក់ការអាវុធហត្ថលេខ២០២ប្រចាំទិសអូរកូនតឹងដែលស្ថិតនៅព្រំប្រទល់ខេត្តឧត្តរមានជ័យ នឹងខេត្តសៀមរាប រងចាំព្រឹកប្រគល់ឲ្យជំនាញ។
សមត្ថកិច្ចបានឲ្យដឹងថា លុះព្រឹកនៅថ្ងៃទី២៣ ខែតុលា ឆ្នាំ២០២១ សមត្ថកិច្ចបានយករថយន្តទៅប្រគល់ឲ្យជំនាញ ដោយមានការដឹកនាំត្រួតពិនិត្យពីលោក ម៉ៅ គីមហួរ ព្រះរាជអាជ្ញារងខេត្តឧត្តរមានជ័យ ធ្វើការទម្លាក់វត្ថុតាងឈើនៅស្នាក់ការផ្នែករដ្ឋបាលព្រៃឈើអន្លង់វែង ដែលត្រួតពិនិត្យរកឃើញថា ភាគច្រើនសុទ្ធតែជាឈើថ្មីត្រាំទឹកដំដែកគោល ផ្ទុកក្នុងរថយន្តមិនក្រោម១៨ម៉ែត្រគូបនោះឡើយ។ ហើយក្នុងនោះ សមត្ថកិច្ចបានរកឃើញទៀតថា រថយន្តដែលដឹកឈើបានក្លែងឯកសារខុសច្បាប់ ដោយប្រភេទរថយន្តម៉ាកHINO ក្បាលពណ៌ស ទ្រុងពណ៌ខៀវពាក់ស្លាក់លេខ ស្វាយរៀង ៣A -១១៥៤ រីឯកាតគ្រីពាក់ស្លាក់លេខស្វាយរៀង ៣A-០៨៥៤ ដែលខុសប្រក្រតី ទើបឯកឧត្ដម ទូច ភក្តី ព្រះរាជអាជ្ញាអមសាលាដំបូងខេត្តឧត្តរមានជ័យ បានអន្តរាគមន៍ឲ្យសមត្ថកិច្ចឃាត់ខ្លួនស្ត្រីជាឈ្មួញឈើ រួមនឹងមនុស្ស ២នាក់ទៀត ជាតៃកុង និងជាព្រូរថយន្ត យកទៅអធិការដ្ឋាននគរបាលស្រុកអន្លង់វែង។
សមត្ថកិច្ចបានបញ្ជាក់ថា ក្រោយពីធ្វើការឃាត់ខ្លួនស្ត្រីជាឈ្មួញឈើឈ្មោះ ឆន សារ៉េន ហៅអ៉ីកុក និងបក្សពួក ព្រមទាំងរថយន្ត សមត្ថកិច្ចបានកសាងសំណុំរឿងបញ្ជូនទៅ តុលាការខេត្តឧត្តរមានជ័យ នារសៀលថ្ងៃទី២៤ ខែតុលា ឆ្នាំ២០២១។
គួរបញ្ជាក់ថា ស្ត្រីជាឈ្មួញឈើឈ្មោះ ឆន សារ៉េនហៅអ៉ីកុក អាយុ៤១ឆ្នាំ រស់នៅភូមិស្រះជ្រៃ ឃុំ-ស្រុកត្រពាំងប្រាសាទ ខេត្តឧត្តរមានជ័យ និងប្តីឈ្មោះ ផេង ជឹម ត្រូវបានតំណាងអយ្យការខេត្តតាកែវ ចេញដីកាឲ្យចូលសវនាការជំនុំជម្រះកាលពីថ្ងៃទី២៩ ខែមករា ឆ្នាំ២០២១ ពាក់ព័ន្ធនឹងសកម្មភាពដឹកឈើខុសច្បាប់លក់ឲ្យទៅដេប៉ូឈ្មោះ ហេង ឌី នៅខេត្តតាកែវ កាលពីថ្ងៃទី១០ ខែកញ្ញា ឆ្នាំ២០២០ ដែលស្ត្រីជាឈ្មួញឈើបានប្រើប្រាស់រូបភាពបន្លំសមត្ថកិច្ចដដែល ដោយយកឈើថ្មីត្រាំទឹករួចហើយដំដែកគោល ដឹកយកទៅលក់ឲ្យដេប៉ូ។ ក្រោយពីសមត្ថកិច្ចជំនាញ ត្រួតពិនិត្យរកឃើញបទល្មើស ហើយរឹបអូសបានវត្ថុតាងឈើ និងរថយន្ត កសាងសំណុំរឿងបញ្ជូនទៅតុលាការខេត្តតាកែវ។PB241021
