(ព្រៃវែង) ៖ អគ្គីភ័យឆាបឆេះយ៉ាងសន្ធោសន្ធៅផ្ទះ១ខ្នងអស់ទាំងស្រុង និងបានរាលដាលអណ្តាតភ្លើងទៅប៉ះពាល់ឆេះជញ្ជាំងផ្ទះអ្នកក្បែរខាងបណ្តាលអោយខូចខាតបន្តិចបន្តួច។ហេតុការគ្រោះអគ្គីភ័យនេះបង្កអោយមានការភ្ញាក់ផ្អើលឡើង កាលពីវេលាម៉ោង១០និង៣០នាទី ថ្ងៃទី៧ ខែធ្នូ ឆ្នាំ២០២០ ស្ថិតនៅក្នុងភូមិ៤ សង្កាត់កំពង់លាវ ក្រុងព្រៃវែ ខេត្តព្រៃវែង។
ម្ចាស់ផ្ទះឆេះអស់ទាំងស្រុងមានឈ្មោះ ជុំ សុភី អាយុ៦០ឆ្នាំ ជាមន្ត្រីចូលនិវត្តន៍(អតីតជាប្រធានមន្ទីរធនធានទឹកខេត្តព្រៃវែង។ផ្ទះមានទំហំ១២ m× ២០m ធ្វើអំពីឈើលើ ថ្មក្រោម ជញ្ជាំងក្តារ ប្រក់សង្ក័សី។ចំណែកផ្ទះរាលដាលឆេះប៉ះពាល់ជញ្ជាំងបន្តិចបន្តួចមានម្ចាស់ឈ្មោះសួរ គឹមហ៊ន ប្រពន្ធឈ្មោះអៀង សុខនឿន (ផ្ទះនៅជាប់គ្នា)។
បើតាមប្រភពបានបញ្ជាក់ថា មូលហេតុនៃការឆេះនេះ គឺបណ្តាលមកពីឆ្លងចរន្តអគ្គីសនី ចេញពីផ្ទះរបស់ឈ្មោះជុំ សុភី។
ក្នុងករណីគ្រោះអគ្គីភ័យនេះដែរ ក៍មានការជួយអន្តរាគមន៍ពីបងប្អូនប្រជាពលរដ្ធជិតខាង និងអាជ្ញាធរភូមិ សង្កាត់ ក្រុង ខេត្ត ព្រមទាំងកងកម្លាំងប្រដាប់អាវុធទាំងបី បានប្រើប្រាស់រថយន្តពន្លត់អគ្គីភ័យចំនួន៤គ្រឿង ប្រើទឹកអស់ចំនួន៦ឡាន ក្នុងនោះរថយន្តស្នងការដ្ឋាននគរបាលខេត្តចំនួន២គ្រឿង, រថយន្ត សាលាខេត្ត១គ្រឿង,និងរថយន្តស្រុកស្វាយអន្ទរ១គ្រឿង ទើបគ្រប់គ្រងស្ថានការបាន100% ជាស្ថាពរ មិនមានប៉ះពាល់ដល់ផ្ទះអ្នកក្បែរខាងធ្ងន់ធ្ងរ និងមិនមានគ្រោះថ្នាក់ដល់អាយុជីវិតមនុស្សឡើយ។ចំពោះទំហំនៃការបាត់បង់ខូចខាតទ្រព្យសម្បត្តិសម្ភារៈនៅមិនទាន់ដឹងទេ៕
