ខេត្តកំពត ៖ ប្រជាពលរដ្ឋខេត្តកំពត រិះគន់ទៅលើចំណាត់ការរបស់ចៅហ្វាយក្រុងបូកគោគឺលោកស្រីងិន ផលរ័ត្នថា រដ្ឋបាលក្រុងកោះអញ្ជើញពលរដ្ឋដើមបណ្តឹងចូលរួមបើកផ្លូវ បែជាអាជ្ញាធរក្រុងមិនអនុវត្តតាមខ្លឹមសារដូចលិខិតដែលរដ្ឋបាលក្រុងបូកគោអញ្ជើញនោះឡើយ។
លោកសែម សឿន ប្រជាពលរដ្ឋម្នាក់ក្នុងចំណោម ប្រជាពលរដ្ឋដើមបណ្តឹងស្នើអោយអាជ្ញាធរបើកផ្លូវខាងលើ លោកបានរិះគន់
ចំណាត់ការរបស់លោកស្រី ងិន ផលរ៍ត្ន ចៅហ្វាយក្រុងបូកគោយ៉ាងចាស់ដៃថាលោកស្រី ចៅហ្វាយក្រុងរូបនេះ ចុះដោះស្រាយបើកផ្លូវជូនពលរដ្ឋក្នុងមូលដ្ឋាន គ្មានប្រសិទ្ធភាព ក្មុងការដោះស្រាយឡើយ។
លោកសែម សឿនបានបន្តថា ចំណាត់ការរបស់លោកស្រីចៅហ្វាយក្រុង ផ្ទុយពីលិខិតដែលអញ្ជើញលោក ក៏ដូចជាពលរដ្ឋផ្សេងទៀត ព្រោះថាក្នុងលិខិតរបស់រដ្ឋបាលក្រុងបូកគោដាក់ច្បាស់ណាស់ថា បានអញ្ជើញរូបលោក និងប្រជាពលរដ្ឋផ្សេងទៀត ថាមកចូលរួមបើកផ្លូវ តែធាតុពិត បន្ទាប់ពីចុះមកដល់ទីតាំងដី បែជាលោកស្រីចៅហ្វាយក្រុងបូកគោរូបនេះ មិនអនុវត្តន៍ច្បាប់ផ្ទុយទៅវិញ ចៅហ្វាយក្រុងនិង លោកកាន់ ពុទ្ធីអ្នកធ្វើរបងបិទផ្លូវ បែជាអះអាងថា ដីដែលធ្វើរបងបិទផ្លូវនេះ មិនមានផ្លូវទៅវិញ។
លោកសែម សឿន បានដាក់ការសង្ស័យថាលោកស្រី ងិន ផលរ័ត្នចៅហ្វាយក្រុងបូកគោ ហាក់ជាមានអាថ៌កំបាំងមិនយកច្បាប់មកអនុវត្តន៍ បែជាខ្លាចអំណាចអ្នកធ្វើរបងបិទផ្លូវទៅវិញ ហើយលោកថា លិខិតលើកទី១ កាលពីថ្ងៃទី០៧ ខែមិនា ឆ្នាំ២០២២កន្លងមកនេះ លោកស្រីថា ដីផ្លូវដែលគេធ្វើរបងបិទនិងកាយដាច់ផ្លូវចោលនេះ ជាដីមានផ្លូវពិតប្រាកដ។
ចំណែកលោកស្រីចុះមកលើកទី២នៅរសៀលថ្ងៃទី១៥ ខែមិនា ឆ្នាំ២០២២ លោកស្រីចៅហ្វាយក្រុង បែជាឆ្លើយថា អត់មានផ្លូវទៅវិញ។
លោកសែម សឿន លោកបាននិយាយទាំងអស់សង្ឃឹមថាលោកស្រីចៅហ្វាយក្រុងប្រហែលជាមិនត្រូវការប្រជាជនក្នុងខេត្តកំពតទេដឹង? ឬមួយក៏លោកស្រីទទួលស្គាល់តែបុគ្គលកាយផ្តាច់ផ្លូវនិងធ្វើរបងបិទផ្លូវនៅឯភ្នំពេញជាជៀងពលរដ្ឋរស់នៅក្នុងមូលដ្ឋាន?
លោកសែម បានបញ្ជាក់បន្តថា ខ្លឹមសារ ដែលមានចែងនៅក្នុងលិខិតរបស់រដ្ឋបាលក្រុងបូកគោច្បាស់ណាស់ កាលពីថ្ងៃទី១៤ ខែមិនា ឆ្នាំ២០២២ ថានិងអញ្ជើញពលរដ្ឋដើមបណ្តឹងអ្នកស្នើសុំបើកផ្លូវនិងអ្នកពាក់ព័ន្ធ ដើម្បីចូលរួមដោះស្រាយបើកផ្លូវជូនពលរដ្ឋ ដែលរស់នៅតំបន់វាលពួច ដែលស្ថិតនៅក្នុងភូមិទទឹងថ្ងៃ សង្កាត់បឹងទូក ក្រុងបូកគោ ខេត្តកំពត ដាក់ជាប្រយោជន៍រួម និងជាសម្បត្តិសាធារណៈ ក៏ប៉ុន្តែអ្វីដែលលោកនិងប្រជាពលរដ្ឋជាច្រើននាក់រំពឹងទុកនោះ បែជាផ្ទុយស្រឡះ បែជាលោកស្រីចៅហ្វាយក្រុង មិនអនុវត្តន៍ដូចលិខិតដែលអញ្ជើញពលរដ្ឋម្ចាស់ប្តឹងសុំបើកផ្លូវនោះឡើយ។
លោកសែម សឿន និងពលរដ្ឋផ្សេងទៀតមានការសោកស្តាយជាពន់ពេក ដោយឃើញសកម្មភាពលោកស្រីចៅហ្វាយក្រុង និងបុគ្គលធ្វើរបងបិទផ្លូវមានភាពស្និតស្នាល ជាមួយអ្នកធ្វើរបងបិទផ្លូវ មិនតែប៉ុណ្ណោះចៅហ្វាយក្រុងបូកគោ បែជាមកបកស្រាយអះអាង អោយពលរដ្ឋនិងលោកឯកភាព ប្តូទីតាំងបើកផ្លូវកន្លែងផ្សេងជំនួសវិញ ព្រមទាំងលោកស្រីបានបង្ហាញផែនទីក្រដាស់ថ្មីអោយពលរដ្ឋមើល ហើយនិយាយថា ដីនេះមិនមានផ្លូវទៅវិញ។
លោកសែម សឿនបានបន្តថា ក្រដាស់ប្លង់ដែលលោកស្រីចៅហកហ្វាយក្រុងបង្ហាញរូបលោក និងពលរដ្ឋដែលចូលរួមនោះ លោកថាជាក្រដាស់ក្លែង ឬក៏ជាគំនូរអោយល្អមើល ដែលររៀបចំបំភាន់រូបលោកនិងពលរដ្ឋ ព្រមទាំងភ្នែកមហាជន លោកថាផ្លូវលំដែលធ្វើរបងបិទនេះ គឺជាផ្លូវរទេះចាស់ ព្រោះលោកជាអ្នកស្រុកតំបន់នេះ លោកនៅតែមានជំហរអះអាងថាគឺជាផ្លូវពិតប្រាកដមែន។
សូមរំលឹកផងដែរថា ពាក់ព័ន្ធផ្លូវលំក្រាលគ្រួសក្រហមនេះដែរ គឺជារឿងទំនាស់អូសបន្លាយអស់រយៈជាង១ឆ្នាំកន្លងមកហើយ ហើយកាលពីកន្លងមកប្រជាពលរដ្ឋដើមបណ្តឹង បានប្តឹងផ្តល់គ្នារហូតឈានដល់តុលាការ និងដល់ក្រសួងមហាផ្ទៃ ក៏ប៉ុន្តែពលរដ្ឋមិនទទួលបានភាពយុត្តិធម៌នូវឡើយ សូមបញ្ជាក់ថាផ្លូវលំខាងលើនេះ កាលពីឆ្នាំ២០២១ ខែកក្តដា ត្រូវបានប៉ាកពួកលោកកាន់ ពុទ្ធី យកអេស្ការវ៉ត់ទ័រមកកាយផ្តាច់ ដោយសំអាងថា ផ្លូវលំនេះធ្វើកាត់លើដីកម្មសិទ្ធិរបស់ខ្លួន តែទោះជាយ៉ាងនេះក្តី ពលរដ្ឋបានលើកឡើងថា ផ្លូវលំនេះ គឺជាផ្លូវរទេះចាស់រាប់សិបឆ្នាំ មកហើយ ពោលគឺតាំងពីដីនេះ ស្ថិតនៅក្នុងទឹកដីសង្កាត់អណ្តូងខ្មែរ ក្រុងកំពតមកម្លេះ ក្រោយមកគ្រាដែលក្រុមនិស្សិតស្ម័គ្រចិត្តរបស់សម្តេចតេជោ ចុះវាស់វែងប្លង់ជាប្រព័ន្ធ០១នោះ ដីមួយផ្នែងខាងត្បូងផ្លូវនៅតំបន់នេះ បានកាត់ចូលទឹកដីភូមិទទឹងថ្ងៃ ឃុំបឹងទូក ស្រុកទឹកឈូវិញ។ ដោយឡែកផ្លូវរទេះចាស់នេះ កាលដែលក្រុមហ៊ុនអគ្គីសនីអើឌីសេ ចុះបោះបង្គោលភ្លើងនៅតំបន់ខាងលើ ខាងក្រុមហ៊ុនបានដោះស្រាយផលបះពាល់ជូនពលរដ្ឋអស់ទៅហើយ ចំណែកឯបង្គោលភ្លើងអើឌីសេ ខាងលើនេះ ត្រូវបានបច្ចេកទេសក្រុមហ៊ុនដាក់អមតាមបណ្តោយផ្លូវរទេសចាស់ គឺចាប់ពីដើមផ្លូវវាលពួច រហូតទល់និងផ្លូវឡើងឧទ្យានជាតិព្រះមុន្នីវងបូកគោ។ ដោយឡែកពលរដ្ឋបានលើកឡើងថា នៅកំឡុងឆ្នាំ២០១៩ ផ្លូវនេះ ត្រូវបានអាជ្ញាធរឃុំបឹងទូកអ្នកស្រីមូល សុខខុម អនុញ្ញាតអោយពលរដ្ឋនិងសប្បុរសជនជាច្រើននាក់ រួមគ្នាជួសជុលព្រមទាំងក្រាលគ្រួសក្រហម
ដើម្បីជាប្រយោជន៍សាធារណៈ លុះក្រោយមកផ្លូវលំនេះធ្វើបានរយៈពេលមួយឆ្នាំគត់មិនទាន់បានរួចរាល់ផង បែជាមានទំនាស់មិនចេះចប់ មិនចេះហើយ ដោយឡែកនៅកំឡុងឆ្នាំ២០១៩ ស្របពេលដែលហាងឆេងដីគ្រានោះ ហក់ឡើងថ្លៃខ្ពស់កប់ពពកផងនោះ ទើបធ្វើអោយជម្លោះរឿងផ្លូវនេះកើតឡើងជាបន្តបន្ទាប់ អូសបន្លាយរហូតមកដល់ឆ្នាំ២០២២ ទោះបីខាងក្រសួងមហាផ្ទៃ ចេញលិខិតអោយអាជ្ញាធរថ្នាក់ក្រោម បើកផ្លូវជូនពលរដ្ឋ យ៉ាងណាក៏ដោយ ក៏អាជ្ញាធរថ្នាក់ក្រោមមិនដូចជាគ្មានប្រសិទ្អិភាពក្នុងការដោះស្រាយឡើយ ចំពោះចំណាត់ការតាំងអតីតក្រោមការគ្រប់គ្រងរបស់រដ្ឋបាលស្រុកទឹកឈូ រហូតមកដល់ចៅហ្វាយក្រុងបូកគោមហាជនមើលឃើញថា រដ្ឋបាលក្រុង ដូចជាខ្លាចអំណាចអ្នកកាយដាច់ផ្លូវនិងអ្នកធ្វើរបងបិទផ្លូវ។
ទុក្ខកង្វល់របស់ពលរដ្ឋខាងលើនេះ ពួកគាត់ស្នើអោយ អភិបាលខេត្តកំពតថ្មី លោកម៉ៅ ធនិន ជួយរកដំណោះស្រាយជូនពលរដ្ឋ បើកផ្លូនពលរដ្ឋ ដោយក្តីមេត្តាផងទាន។
