ខេត្តកោះកុង ៖ (ចេញផ្សាយវគ្គ២) ក្រោយពីអង្គភាពសារព័ត៌មានយើងខ្ញុំបានធ្វើការចុះផ្សាយទម្លាយរឿងរ៉ាវអាស្រូវរបស់អ្នកសារព័ត៌មានម្នាក់ឈ្មោះយួនឈីវកាលពីថ្ងៃទី៣ខែធ្នូឆ្នាំ២០២៤កន្លងទៅប្រាំខែមុនពាក់ព័ន្ធនិងករណីលោកចាងហ្វាងគេហទំព័ររូបនេះដើរជម្រិតទាប្រាក់ពីប្រជានេសាទព្រមទាំងកាងបទល្មើសនេសាទផងក្នុងទឹកដីឃុំថ្មសស្រុកបូទុមសាគរខេត្តកោះកុងដោយប្រើប្រាស់តួនាទីជាអ្នកសារព័ត៌មានផងនិងជាមន្ត្រីជំនាញអ្នកស៊ើបអង្កេតនៅក្នុងលំហសមុទ្រផងក្នុងការធ្វើសកម្មភាពគម្រាមកំហែងនិងបំភិតបំភ័យដើម្បីទទួលបាននូវលាភសក្ការៈពីបទល្មើសនេសាទទាំងនោះ។ បើទោះបីអង្គភាពសារព័ត៌មានយើងធ្លាប់ធ្វើការចុះផ្សាយរឿងលោកយួនឈីវប្រព្រឹត្តស្មូកគ្រោគស្អុយរលួយដែលសង្គមស្អប់ខ្ពើមនិងប្រាស់ចាកនិងផ្លូវច្បាប់យ៉ាងណាក្តីមកដល់ថ្ងៃទី ១១ ខែឧសភាឆ្នាំ ២០២៥នេះគេនៅតែឃើញវត្តមានលោកយួនឈីវដើររាតត្បាតនឹងធ្វើសកម្មភាពដដែលៗដោយមិនញញើតច្បាប់សោះឡើយ។ពលរដ្ឋដែលរស់នៅក្នុងភូមិសាស្ត្រឃុំថ្មសបានលើកឡើងថាចំពោះករណីលោកយួនឈីវនេះតើលោកជំទាវចាតសូរស្មីតំណាងអយ្យការសាលាដំបូងខេត្តកោះកុងបានបើកការស៊ើបអង្កេតករណីខាងលើនេះដែរឬមួយយ៉ាងណា?ជាពិសេសឯកឧត្តមនេតភក្ត្រារដ្ឋមន្ត្រីក្រសួងព័ត៌មានគិតយ៉ាងណា?ចំពោះអាជ្ញាប័ណ្ណចេញដោយក្រសួងព័ត៌មានដែលបានផ្តល់ឱ្យទៅលោកយួនឈីវតើខាងក្រសួងមិនបានដឹងទេឬ?ថាចាងហ្វាងសារព័ត៌មានត្បាញអាយរូបនេះកំពុងតែប្រព្រឹត្តខុសទៅនឹងក្រមសីលធម៌និងវិជ្ជាជីវៈជាអ្នកសារព័ត៌មានយ៉ាងពេញបន្ទុក។ ចំពោះឯកសារបែកធ្លាយវីដេអូនិងសារសំឡេងជាច្រើនដែលលោកយួនឈីវបានប្រព្រឹត្តធ្វើសកម្មភាពជំរិតទាប្រាក់ពីប្រជានេសាទនិងតាំងខ្លួនជាមន្ត្រីជំនាញដើម្បីកៀបស៊ីបទល្មើសនេសាទនិងរៀបចំផែនការកាងបទល្មើសជលផលផងនោះត្រូវបានលោកយួនឈីវធ្លាប់ធ្វើការបដិសេធនាមិនទទួលស្គាល់នាពេលកន្លងទៅហើយថារឿងនេះជារឿងមិនពិត!ជាមួយគ្នានោះលោកយួនឈីវធ្លាប់ធ្វើការគំរាមព្រមានដល់អ្នកសារព័ត៌មានដែលសម្ភាសន៍រូបលោកហាមយកសំឡេងលោកទៅចាក់ផ្សាយផងដែរ។ ប្រជានេសាទអ្នករកស៊ីលក្ខណៈគ្រួសារក៏ដូចជាប្រជាពលរដ្ឋរស់នៅឃុំថ្មសស្រុកបូទុមសាគរខេត្តកោះកុងនៅតែមានក្តីសង្ឃឹមលើលោកជំទាវចាតសូរស្មីតំណាងអយ្យការអមសាលាដំបូងខេត្តកោះកុងនិងបើកការស្រាវជ្រាវរឿងលោកយួនឈីវចាងហ្វាងគេហទំព័រព័ត៌មានកោះកុងទាន់ហេតុការណ៍ដោយយោងតាមក្រមព្រហ្មទណ្ឌនៃព្រះរាជាណាចក្រកម្ពុជាដើម្បីយកបុគ្គលនេះមកផ្ដន្ទាទោសទៅតាមផ្លូវច្បាប់។ជាពិសេសឯកឧត្តមនេតភក្ត្រារដ្ឋមន្ត្រីក្រសួងព័ត៌មានសូមឯកឧត្តមជួយពិនិត្យមើលអាជ្ញាប័ណ្ណរបស់លោកយួនឈីវដែលចេញដោយក្រសួងព័ត៌មានថាតើគួរទុកឲ្យបន្តធ្វើរឿងក្តៅក្រហាយដល់ប្រជាពលរដ្ឋតទៅទៀតឬក៏គួរតែនឹងដកចោល។ព្រោះថាជននេះកំពុងជ្រកក្រោមស្លាកអ្នកសារព័ត៌មានទៅប្រព្រឹត្តបទល្មើសដែលផ្ទុយទៅនឹងក្រមសីលធម៌និងវិជ្ជាជីវៈអ្នកសារព័ត៌មានផងនោះ។ អង្គភាពសារព័ត៌មានយើងសន្យាថានឹងវិលមករាយការណ៍នៅព័ត៌មានបន្តទៀតនៅលេខក្រោយជុំវិញរឿងរ៉ាវខាងលើនេះសូមអរគុណ៕...
